آسر ياسين: سهير البابلي قالتلي مش هتكمل في الفن بسبب أدبك.. ولو حد شاف تمثيلي في البداية مكنش هيشغلني
تحدث الفنان آسر ياسين، عن بدايته الفنية وسبب رفض والدته لـ دخوله الوسط الفني، بجانب الكشف عن تنبؤ الراحل سهير البابلي له بعد استكمال مشواره الفني بسبب طبيعته الخجولة.
وقال آسر ياسين، في لقائه مع الفنانة والإعلامية إسعاد يونس، بـ برنامجها صاحبة السعادة: اشتغلت مع سهي البابلي مسلسل قلب حبيبة، وقالتلي أنت بالذوق والأدب بتاعك ده مش هتكمل، وطبيعة الفنانين الشو ولكني لو عملت كده دي مش طبيعتي، فأنا ركزت في الشغل أكتر وربنا حط في طريقي ناس ولاد حلال وفرشولي السكة.
آسر ياسين: سهير البابلي قالتلي مش هتكمل في الفن بسبب أدبك.. ولو حد شاف تمثيلي في البداية مكنوش هيشغلوني
وتحدث آسر ياسين عن بداياته الفنية، قائلًا: عمري ما حسيت وأنا صغير أني هكون دنجوان أو ممثل أصلًا، والموضوع كان بالصدفة، أنا دخلت هندسة الجامعة الأمريكية، ومسرح الجامعة قوي جدًا وكان من عواميد المسرح محمود اللوزي واتعرفت على المسرح وحبيته جدًا، وقبل ما أتخرج كنت محدد أني هبقى ممثل.
وواصل: وأنا حسيت أني محتاج ده ومحتاج أعيش في شخصيات تانية، مش عايز أشتغل اللي أنا كنت فاكرة، وطبعًا في الأول كان تمثيلي وحش جدًا ومش عارف الناس دي شغلتني إزاي، لو حد شاف تمثيلي الأول محدش كان هيشغنلي.
آسر ياسين: والدتي مكنتش موافقة على دخولي الفن لأن العيلة مهندسين
كما كشف آسر ياسين، موقف أهله من دخوله الوسط الفني، قائلًا: والدتي مكنتش موافقة على دخولي الفن، وكانت بتكلمني كل يوم تعيط وتقولي أنت بتضيع مستقبلك إحنا موظفين ومهندسين أنت بتعمل إيه؟، ولكن والدي اتعامل معايا بشكل منطقي وقالي إديني خطة ولازم يكون في دلالات على النجاح، قولتله أنا في خلال سنة لو محققتش علامات معينة تقول أني ممكن أنجح هرجع للهندسة اللي مبدأتهاش أصلًا،ودي عملت معايا زي صلاة الاستخارة ودي عبقريتها أن أنت بتسلم وبتسعى فالسعي بيقولك ده مردوده عامل إزاي وأنت ماشي في المشروع.
وأردف: دي من الحاجات اللي طمنتني، لغاية ما السنة خلصت وقدرت أتكفل بنفسي ماديًا وأهلي اتطمنوا أكتر وكل الناس اللي وقفت جنبي وكل التوفيق من عند ربنا وشاكر جدًا لـ ده.
وأكد آسر ياسين، حرصه على التنوع بين أدواره، قائلًا: التنوع كان بالنسبة ليا أهم حاجة كفنان علشان أنا أبقى مرضي، وأنا لقيت أني عمري ما هرضى أعمل نفس الحاجة في الشغلانة لأنها مش هتبقى صادقة وده هيوصل للجمهور، وفي الآخر أنا الفن بيعلمني وفيلم رسائل البحر من الأفلام اللي فرقت معايا أوي.
