فتاة توثق لحظة تعدي عامل بـ ستاربكس على صغيرة: جرّها من إيديها وأخدها جوه كمّل ضرب
تداول مستخدمو مواقع التواصل الاجتماعي، منشورًا لفتاة تدعى دنيا متولي، بشأن تعدي عامل في ستار باكس على فتاة صغيرة لا يتخطى عمرها الـ 10 سنوات، رصد تعدي العامل على الفتاة، مطالبة الجهات المختصة اتخاذ الإجراءات القانونية تجاه العامل.
عامل في ستاربكس يتعدى بالضرب على صغيرة
وقال دنيا متولي، في منشور لها عبر حسابها بموقع فيسبوك، النهاردة كنت راكنة عند ستاربكس اللي في بنزينة Chillout على طريق إسكندرية الصحراوي، وحصل قدامي موقف وحش جدًا، شوفت شاب من اللي شغالين في ستاربكس طالع من الجراج بيجري، وراح مسك بنت صغيرة عمرها تقريبًا 8 أو 10 سنين بالكثير كانت بتشحت هناك، وفجأة بدأ يضرب فيها جامد جدًا، وبعدين مسكها من إيديها وجرها لحد شباك الـDrive Thru، والبنت مش قادرة تهرب منه ولا حتى تدافع عن نفسها.
وأضافت: غاب بيها دقيقتين جوه معرفش كان بيعمل إيه بيكمل ضرب ولا إيه بالظبط، الله أعلم، والبنت خرجت بعد كده منهارة، ماسكة دراعها زي ما باين في الفيديو، وراحت قعدت جنب أخوها الصغير وفضلت تعيط، أنا للأسف ملحقتش أصوّر من أول لحظة وهو بيضربها، لأني كنت مصدومة ومش متخيلة إن ده ممكن يحصل، بس أكيد في كاميرات في المكان ومسجلة كل اللي حصل.
وأضافت دنيا متولي، فتاة وثقت تعدي عامل بستاربكس على صغيرة، ماقدرتش أنزل وقتها وهو بيضربها لأن بصراحة خفت، شخص بالجنان والأخلاق دي مش عارفة ممكن يتصرف إزاي أو يرد عليا إزاي، والمؤسف إن ولا واحد من الرجالة اللي كانوا في العربيات حوالينا فكر ينزل أو يتدخل أو حتى يسأل في البنت، وبعد شوية روحتلها، ولما بدأت أتكلم معاها البنت انهارت من العياط، مش قادرة تستوعب اللي حصل، وصعبانة عليها نفسها جدًا وجسمها واجعها من الضرب، وكل اللي قدرت أعمله إني قعدت أطبطب عليها وأطيب خاطرها.
واسكملت دنيا متولي: أنا بتمني إن الكلام دا يوصل له، أنا معرفش هو مرّ بإيه في حياته أو إيه اللي خلاه يوصل للدرجة دي من القسوة والجحود، بس إنك تضرب طفلة في الشارع معاها أخوها الصغير لا حول ليها ولا قوة وبتشحت، بدل ما تساعدها أو حتى تسيبها في حالها، دة معناه انك شخص بجد مريض، ومحتاج مساعدة حتي لو البنت عاملة حاجة غلط اي كان هو اية دة ميدكش ولا انت ولا اي حد الحق انك تتعدي عليها، وكدا كدا ربنا ها يجيب حق البنت عاجلًا أم آجلًا وانت ها تعرف انة حقها، وأتمنى إدارة ستاربكس تشوف اللي حصل دا ويتحققوا من الكاميرات وياخدوا إجراء واضح تجاه الشخص ده.
