مش فارق لي.. أول تعليق من مصطفى كامل بعد اعتذار مسلم | خاص
علق نقيب المهن الموسيقية مصطفى كامل، على اعتذار المطرب مسلم له وللنقابة، بعد الإساءة لهما واتهام مصطفى كامل بعدم مراعاة حالته الصحية.
وقال مصطفى كامل خلال تصريحاته لـ القاهرة 24: مكنش فارق لي لما مسلم دعا عليا وقال حسبي الله ونعم الوكيل، فـ بالتالي مش فارق لي لما يعتذر.
وحول موقف إيقاف مسلم من الغناء، قال مصطفى كامل: النظر في قرار إيقافه بيرجع للنقابة، وإحنا مش قرايب عشان يعتذرلي، إحنا شغالين في مؤسسة وبيحكمنا قانون.
اعتذار مسلم لـ مصطفى كامل ونقابة المهن الموسيقية
واعتذر مسلم منذ قليل، لنقيب المهن الموسيقية مصطفى كامل، عبر ستوري حسابه الرسمي بموقع إنستجرام، حيث قال: الفيديو ده بقدم فيه اعتذاري للنقابة والنقيب مصطفى كامل، ولو كنت دعيت عليك أو حاجة ده بسبب إني شاب لوحدي، وكنت تعبان وملقتش حد يقف جنبي في تعبي، وبيتي اتخرب في الفترة اللي اتوقفت فيها عن الغناء.
وأضاف مسلم: كان أقل طموحي إني أشتغل زي زمايلي، بعتذر لك وأنا زي ابنك وأنا قد اعتذاري حتى لو مش هشتغل، ومشتمتش حد أنا قولت حسبي الله ونعم الوكيل بس، وانتوا بيتي وأهلي وأستاذ مصطفى من وقت ما مسك النقابة وهي في تطور.
أزمة مصطفى كامل ومسلم
وتصاعدت أزمة مسلم مع النقابة بعد منشور كتبه عبر حسابه الرسمي على إنستجرام من داخل المستشفى، أعلن إصابته بانسداد في أحد شرايين القلب، متهمًا نقيب المهن الموسيقية مصطفى كامل بأنه السبب في ما يمر به من تدهور صحي ونفسي.
