الأمن يفحص واقعة اعتداء سائق تاكسي على سيدة أمام صغارها في بورسعيد
تفحص أجهزة الأمن بمديرية أمن بورسعيد، مقطع فيديو تم تداوله على مواقع التواصل الاجتماعي، يظهر من خلاله اعتداء سائق تاكسي على إحدى السيدات أمام أطفالها في مدخل إحدى العمارات بسبب الخلاف على الأجرة.
اعتداء سائق تاكسي على سيدة في بورسعيد
وظهرت السيدة من خلال كاميرا المراقبة وهي تتحدث مع السائق في مدخل العمارة وعند محاولتها ركوب الأسانسير رفقة أطفالها حاول التعدي عليها بالضرب ومحاولة خطف حقيبتها للحصول على أموال.
ونشرت السيدة عبر مواقع التواصل الاجتماعي تفاصيل الواقعة، قائلة: أنا وأولادي اتضربنا واتسرقنا قدام بيتنا… ومحدش ساعدنا!.. مش قادرة أصدق اللي حصل معايا…
وأضافت: كنت راجعة من بورسعيد لبورفؤاد، ركبت تاكسي من بورسعيد لبورفؤاد، واتفقنا على الأجرة تكون 50 أو 60 جنيها.. ولما وصلني لحد برج “جنا” في شارع الجمهورية، طلعت من شنطتي 100 جنيه وقلت له بمنتهى الذوق.. “تحب تاخد 50 ولا تاخد الـ100 وتجيب الباقي؟”
وتابعت: اللي حصل بعد كده كان كابوس.. لقيته فجأة يشد الـ100 جنيه من إيدي ويرميلي 20 ويقولي بمنتهى الوقاحة.. الأجرة 80!.. قلت له بالراحة إن ده مش اتفاقنا، وسِبتله 50 جنيها ومشيت.. فجأة لقيته نازل من العربية بيجري ورايا، شد الفلوس من إيدي بالعافية، وبدأ يزعق ويشتم بألفاظ قذرة قدام أولادي.
واستكملت: وبدأ يضربني وأنا ماسكة في شنطتي، وأولادي بيصرخوا حواليا، مرعوبين!.. بواب العمارة طلع على صراخي، وأنا بعيط وبقول له.. يا أبو إسلام اتصل بالنجدة، الراجل ده بيضربني وبيسرقني.. الراجل خطف الشنطة مني بالعافية وجري.. جريت وراه وأنا بصرخ.. هات الشنطة يا ابو اسلام ده فيها 10 آلاف جنيه والايفون والايباد وأوراق مهمة جدًا من شغلي هتصل بالنجده!”
وقالت: الصدمة الأكبر كانت إنه رجع تاني، ضربني جوه الأسنسير، وقعني على الأرض قدام أولادي، وخد البوك اللي فيه المبلغ كله والأوراق.. ولما حاولت أرجعه، ضربني تاني قدام ولادي، وقعني على الأرض، وخد البوك اللي فيه الفلوس والأوراق وطلع يجري.. أنا منهارة… مش قادرة أنام، ولا أنسى نظرة الخوف في عيون أولادي.. إزاي واحد بالشكل ده يبقى ماشي في الشارع حر.. إزاي مفيش أمان؟
واختتمت حديثها بقولها: أنا عملت بلاغ… بس محتاجة صوتكم معايا.. شاركوا البوست ده، ساعدوني أوصل صوتي.. أنا أم، واتضربت واتسرقت قدام باب بيتي، وكل اللي طالبة حقي.
