اتفاجئت بحجر ومعرفتش أفادي الميكروباص.. سائق التريلا يروي في التحقيقات لحظات الرعب بحادث الطريق الإقليمي| انفراد
كشفت التحقيقات تفاصيل جديدة في حادث التصادم المروع أعلى الطريق الإقليمي بمحافظة المنوفية صباح الجمعة 27 يونيو 2025، والذي أسفر عن مصرع 19 شخصًا، بينهم 18 فتاة، وإصابة 3 آخرين، بعدما اصطدمت سيارة نقل تريلا بالسيارة الميكروباص التي كانت تقل الضحايا إلى عملهم في إحدى المزارع لجني العنب تفاصيل مثيرة.
أقوال سائق التريلا في حادث الطريق الإقليمي
وينفرد القاهرة 24 بنشر التحقيقات في القضية التي حملت رقم 17690 لسنة 2025 إداري أشمون، وما جاء في أقوال المتهم بالتحقيقات، والذي روى تفاصيل اللحظات الدامية التي حوّلت الطريق إلى مجزرة جماعية مروعة.
حادث المنوفية المروع
وأمام جهات التحقيق وقف المتهم سامي ناصر يروي تفاصيل لحظات الرعب التي أوجعت قلوب المصريين قائلا: اللي حصل إن النهاردة، 27-6-2025، حوالي الساعة 8 الصبح، كنت ماشي على الطريق الإقليمي بعد كارتة الخطاطبة بمركز أشمون، بالعربية التريلا اللي أنا سايقها، على سرعة حوالي 50 كم/س كده تقريبًا، وكنت جاي من كارتة الخطاطبة ومتجه ناحية بنها الحر.
وأضاف المتهم المتسبب في حادث الطريق الإقليمي بالمنوفية: فجأة، وأنا سايق، لقيت عربية ميكروباص ماشي قدامي، فخدت أقصى الشمال علشان أعدي منها، وفجأة لقيت حجر في التلتوار اللي في النص بين الطريقين رايح جاي، الحجر اللي شبه البندورة كان خارج بره شوية عند الحد بتاعه، وكنت هخبط فيه لو فضلت ماشي مستقيم.
وأكمل المتهم أمام جهات التحقيق في واقعة حادث الطريق الإقليمي بالمنوفية: من ارتباكي، اختلت عجلة القيادة مني، واختل توازن العربية والمقطورة اللي أنا سايقهم، وعديت التلتوار اللي في النص غصب عني، واتفاجئت إني بقيت ماشي عكسي للحظات، واتفاجئت بعربية ميكروباص لونها أبيض جاية في وشي، ماعرفتش أفاديها، وخبطت فيها ببوش التريلا.
واختتم المتهم المتسبب في مصرع وإصابة 22 شخصا على الطريق الإقليمي بالمنوفية: نزلت من العربية وجريت، لأن المنظر كان صعب أوي، وأنا خفت، وحسيت إنه لو ما هربتش، الأهالي كانوا ممكن يموتوني، وبعدها بحوالي ساعة تقريبًا، روحت على مركز شرطة أشمون وسلّمت نفسي، وهناك عرفت إن أغلب اللي كانوا في الميكروباص اللي أنا خبطته ماتوا، وناس منهم لسه متصابين.
