حازم إمام يعلن انتهاء دور لجنة التخطيط بنادي الزمالك
أعلن حازم إمام نجم الزمالك السابق وعضو لجنة التخطيط بالقلعة البيضاء، انتهاء مهمة اللجنة بشكل تام، وذلك بعد أيام من إعلان أحمد حسام ميدو عضو اللجنة السابق رحيله عنها عقب توقيعه عقد تقديم برنامج تليفزيوني.
رحيل لجنة التخطيط بنادي الزمالك
وفي تصريحات إذاعية، علق حازم إمام على مصير لجنة التخطيط بالزمالك قائلًا: بخصوص لجنة التخطيط خلاص مبقناش موجودين ومبقاش لينا دور ومفيش حاجه اسمها لجنة تخطيط.
ووصل حازم إمام: الكلام ده قولناه من زمان أول ما ييجي مدير رياضي إحنا خلاص ملناش وجود وأصلا الموضوع مكنش بالشكل ده.. وفي حاجه مش هقول بتضايقني لكني مش مبسوط منها لما أطلع أتكلم في حتة.. الناس حصراني في حتة حازم إمام عضو لجنة التخطيط.. كأني بقول حاجه من جوا الزمالك.
وأكمل نجم الزمالك السابق: الموضوع انتهى تماما وحاليا مش متواجدين سواء أنا ولا الأستاذ عمرو الجنايني وميدو كان كتب كمان.. وكل التوفيق لمجلس الإدارة وكل التوفيق لجون إدوارد، ولو فيه حاجة استشارة أكيد مرحب في أي وقت.
واستطرد حازم إمام قائلا: في ناس بتقولي كلم جون عشان لاعب فلاني، هو المسؤول عن كل حاجة واحنا منعرفش حاجة ومدخلناش في أي حاجة وهو اللي بيقود مع كابتن حسين لبيب والمجلس، وأنا مكنتش أعرف مين المدرب اللي جاي والمجلس وكابتن حسين هما اللي جابوا الجهاز الجديد.
وتطرق حازم إمام إلى البلجيكي يانيك فيريرا المدير الفني الجديد للزمالك قائلًا: النهاردة المدرب الجديد للزمالك يانيك فيريرا وصل، وأعتقد هيتقدم النهاردة أو بكرة بالكتير وكل التوفيق.
وأكمل: مدرب كويس اشتغل في الدوري البلجيكي والدوري السعودي عارف المنطقة العربية وصغير في السن، وهو والجهاز المعاون هياخدوا الأربعة تقريبا 50 ألف دولار.
وتطرق حازم إمام إلى أيمن الرمادي المدير الفني السابق لنادي الزمالك، قائلا: شوفت بوست لكابتن أيمن الرمادي في منتهى الجمال وكأنه واحد من أبناء الزمالك، وإنه مش هيشتكي علشان مستحقات وكان كلامه محترم جدا وربنا يوفقه.
