الأوقاف عن شماتة البعض في الموت: لو مش قادر تدعيله متبقاش سبب في أذى أهله
علقت وزارة الأوقاف، على شماتة البعض في الموت قائلة: اللي مات خلاص راح للي أرحم بيه من كل اللي خلقه، ممكن متكونش تعرف الشخص اللي مات، ولا بتحب شُغله، ولا حتى متفق معاه في حاجة، بس وقت الموت، مش وقت تصفية حسابات، ولا فرصة للتشفي.
الأوقاف تعلق على شماتة البعض في الموت
وكتبت عبر حسابها على موقع التواصل الاجتماعي فيس بوك: اللي مات خلاص راح للي أرحم بيه من كل اللي خلقه، ممكن متكونش تعرف الشخص اللي مات، ولا بتحب شُغله، ولا حتى متفق معاه في حاجة، بس وقت الموت مش وقت تصفية حسابات، ولا فرصة للتشفي، الموت بيكشف قلوبنا مش قلوب اللي ماتوا، وبيعرّينا قدام ضميرنا قبل الناس، لما حد يموت، ويرجع لربه، إحنا اللي لسه واقفين هنا بنختبر.
وتابعت: المؤلم مش فُقدان الشخص بس، المؤلم إن في ناس بتحرم عليه الرحمة، وبيتكلموا كأن معاهم مفاتيح الجنة والنار، كأنهم شافوا نهايته.. وسَمِعوا بينه وبين ربنا، هو حد فينا شقّ عن قلبه؟، هو حد فينا عارف خاتمته كانت إيه؟، هو إحنا نسينا إن ربنا رحيم.. وإن رحمته وسعت كل شيء؟، اللي يشمت في الموت.. مش بس قلبه غليظ، ده عنده خلل في الفطرة، الناس كانت زمان تقول "الله يرحمه" أول ما تسمع خبر وفاة.
وتابعت: دلوقتي بقى في ناس تقول ما يستاهلش، وفي اللي بيتكلم كأنه شاف مصيره، وقرر هو بنفسه نهايته عند ربنا، لو عندك رحمة… ادعيله، ولو مش قادر تدعي… اسكت، بس متبقاش سبب في أذى أهله، ولا ألم ناسه، ولا فضح نفسك قدّام ربك!، اللهم نقِّ قلوبنا من القسوة، واجعلنا من عبادك الرحماء.
