أبرز تصريحات فردوس عبد الحميد: حياتي الشخصية متخصش حد.. وعمري ما قلت لـ ابني خالد الحلفاوي مبشتغلش معاك ليه؟
حلت الفنانة فردوس عبد الحميد، ضيفة على أحد البرامج الإذاعية وتحدثت خلال اللقاء عن آخر أعمالها مسلسل حرب الجبالي بطولة الفنان أحمد رزق، وعن أصعب أعمالها بمشوارها الفني.
أبرز تصريحات فردوس عبد الحميد
مبحبش حد يسألني في الحاجات الشخصية أوي لأنها متخصش حد.
- وافقت على مسلسل حرب الجبالي لأن العلاقة بين الضراير وعادة بيبقوا مبيحبوش بعض ولكن الدور ده العكس تمامًا.
- اللي فرّحني في مسلسل حرب الجبالي هو رد فعل الصبية والبنات الصغيرين، وعلشان كده بتصور معاهم وبحاول أصاحبهم، عشان يتعودوا على شكلي ويعرفوا اسمي.
- سبب مشاركة عدد كبير من النجوم في حرب الجبالي هو العمل والنص نفسه، وإن الأحداث ممكن تبقى حقيقية ومش مفتعلة، البيت المصري البسيط زي بيوتنا كلنا، اللي فيه الأمهات والإخوات والضراير، واللي فيه ألفة ما بينهم، كل ده جذب زملاء كتير، وكل واحد له دوره الملائم له.
- مشهد موت ياسين في حرب الجبالي قهرني ووجعلي قلبي.
- أحمد رزق لطيف وتمثيله هادي ومريح، ومن غير عصبية وصوت عالي، وهو من الممثلين اللي الواحد يحب يشتغل معاهم.
- عمري ما أسأل ابني خالد الحلفاوي أنا مبشتغلش معاه ليه، ولا ممكن هو يجبني في حاجة متلقش بيا، وإحنا سايبين الموضوع للظروف المناسبة.
- فيلم ليلة القبض على فاطمة أرهقني أوي وحبيته أوي لأن كان فيه معاناة.
- أسماء أبو اليزيد فيها كل مواصفات الممثلة، الوش المصري الصميم واللون بتاعنا وعينيها بتلمع، مفيش بقى الجمال اللي عينيها خضراء وشعرها أصفر، وهي اللي علمت نفسها وصوتها فيه حنية.
- أسماء أبو اليزيد هتبقى من الأوائل في الوطن العربي كله، وبقولها شكرًا أنك مبتاخديش بالمظاهر ومحترمة فنك.
