أقل حاجة مقابل تاريخه العظيم.. أول تعليق من الطيار خالد رفعت صاحب لافتة شكرا شيكابالا في الساحل |خاص
تداول مستخدمو مواقع التواصل الاجتماعي، صورًا من سماء مدينة العلمين لطائرة تحمل لافتة «شكرا شيكابالا»، ما أثار حالة إعجاب واسعة عبر منصات السوشيال ميديا.
أول تعليق من الطيار صاحب فكرة لافتة الساحل
وقال الطيار خالد رفعت، صاحب فكرة الإعلان الجوي لـ شيكا في تصريحات خاصة لـ القاهرة 24: دي أقل حاجة نقدر نقدمها لشيكابالا على تاريخه، وناس كتير اتفاعلت مع الفكرة، شيكا لاعب صاحب تاريخ طويل وكنا عاوزين نقوله شكرا بالفكرة دي، وكان الهدف إننا نقوله شكرا على تاريخك والفترة اللي فاتت والمشوار الطويل.
وأضاف: عملنا إعلان جوي النهاردة عشان نقوله شكرا شيكابالا وطلعت الطيارة من مطار العلمين، ووصلت الساحل الشمالي كله بـ لافتة شكرا شيكابالا، وكل الناس شافوه وبدأوا يصوروا وكانوا متفاعلين جدا مع الفكرة.
وتابع: كانت لقطة جميلة وهو نزل الفيديو على صفحته الرسمية وبعيدا عن أي انتماءات بس تاريخه كبير وقلبه أبيض وكلنا بنعشقه ودي أقل حاجة نقدر نقدمهاله بسبب مشواره العظيم.
ولاقت صورة شكرا شيكا، إعجاب مستخدمي السوشيال ميديا، خلال الساعات القليلة الماضية، ما دفع عدد كبير من مشجعي الزمالك لمشاركتها عبر حساباتهم الشخصية معلقين: شكرا شيكا من كل قلوبنا بنحبك، موضحاً أن الوكيل الإعلاني للفكرة شركة سيلفر سكرين.
