بسبب خلافات على المشاريب.. والدة شاب قُتل على يد آخر بالدقهلية تطالب بالقصاص: «كان مصدر دخلنا الوحيد وقتلوه بطعنة غدر»
شهدت مدينة شربين بمحافظة الدقهلية، واقعة مأساوية راح ضحيتها شاب يُدعى "حسن"، وذلك أثناء عمله داخل أحد المقاهي، بعد مشادة كلامية نشبت بينه وبين أحد الأشخاص انتهت بطعنة أودت بحياته.
بسبب خلافات على المشاريب.. والدة شاب قُتل على يد آخر بالدقهلية تطالب بالقصاص: «كان مصدر دخلنا الوحيد وقتلوه بطعنة غدر»
وفي تصريحات خاصة لـ"القاهرة 24"، روت والدة المجني عليه تفاصيل الواقعة قائلة: "ابني حسن كان بيشتغل في القهوة دي من أول مايو، وكان بيصرف علينا، لأنه كان مصدر دخلنا الوحيد، بعد ما أخوه عبد الرحمن توفى غرقًا من 10 سنين، ومش باقيلي غير بنته الصغيرة رحمة".
وأضافت: "يوم الواقعة، اللي حصلت يوم الأربعاء اللي فات، جاتلي مكالمة من بنت أختي بتقولي: تعالي يا خالتي، خالي ناصر بيتخانق مع ناس، والمشكلة كانت على حلقة بطيخ، وبعد كده حاولت أكلمها تاني، قالتلي لأ تعالي على المستشفى".
وأشارت الأم إلى أنها توجهت إلى المستشفى لتجد أول ما قابلها "شبشب ابنها غارق في الدم"، وتابعت: "بنتي دخلت وقالتلي: حسن مات.. ومن ساعتها وأنا في حالة انهيار عصبي، لأني مش قادرة أصدق اللي حصل".
وواصلت حديثها قائلة: "ابني حسن هو اللي كان شايل مسؤولية البيت، وقالي: يا ماما اقعدي من الشغل وأنا هصرف، وفعلًا كان بيجبلي كل حاجة أنا محتاجاها".
وتابعت الأم: "كل اللي حصل إن المتهم دخل المقهى وشرب عصير عنب من التلاجة بدون إذن، فابني منعه، وبدأت مشادة كلامية، وبعد وقت قصير دخل المتهم المطعم ومعاه مطواة، واعتدى على خاله الأول بسبع غرز في رقبته، وبعدها راح لحسن وطعنه في رقبته، ومات على الفور".
واختتمت الأم حديثها بطلب القصاص قائلة: "أنا مش طالبة غير حق ابني، حسن كان فرحة البيت وسنده، وموته صدمة كبيرة، وعايزة حقه بالقانون".
