أحمد الجندي يكشف تفاصيل انضمام رحمة أحمد لمسلسل الكبير: خدنا قرار مشاركتها في 10 دقائق
كشف المخرج أحمد الجندي، تفاصيل مشاركة الفنانة رحمة أحمد، في مسلسل الكبير أوي بطولة الفنان أحمد مكي، والتي حققت نجاحًا كبيرًا وانتشارا واسعا منذ مشاركتها لأول مرة في الموسم السادس للعمل.
وقال أحمد الجندي، في لقائه مع الإعلامية زهرة رامي، في برنامج إنرجي بلس، عبر إذاعة راديو إنرجي: رحمة أحمد دي قصة غريبة جدًا، كنا بنعمل مسلسل الكبير ودنيا سمير غانم مش هينفع تبقى موجودة فيه، طيب إحنا محتاجين بطلة، وأي حد هيجي الجمهور هيقارنه بـ دنيا ولا وجه مقارنة واللي هتيجي هتتظلم، وقولنا لو جبنا حد معروف هتتشاط على طول، قولنا نجيب حد جديد خالص ونزق ونشوف، عملنا تجارب أداء لأكتر من حد، وجالي تليفونات من زملاء إن في بنت بتعمل عرض وطه دسوقي قالي في بنت عاملة سكتشات مع أحمد أمين كويسة، وأحمد مكي قالي أحمد أمين كلمني على بنت كويسة جدًا.
وتابع أحمد الجندي: اكتشفنا أن كلنا بقالنا 3 أيام بنتكلم على رحمة، ورحنا شفنا العرض وجت قعدت معانا 10 دقائق وبعد الـ 10 دقائق مكملناش وقولنا مبروك، لأن لقينا أن هي فاهمة نوع الهزار بتاعنا لأن الكبير ولله الحمد ليه نوع هزار الناس بقت بتقبله، أننا بنقول قمة العبث ولكن بجد جدًا، ودي الشعرة في الكوميدي والبنات تحديدًا أن أنا بمثيل بجد بس أنا بهزر والاستظراف دي مصيبة سوداء مفيش فيها في النص، والدراما ممكن تقولي كلمة ولكن الكوميدي يا أضحك يا مش هضحك، والموضوع صعب مع الجمهور المصري لأن بعد 5 أجزاء وأكتر من 150 حلقة، ولقينا عندها ده وفاهمة نوع الهزار بتاعنا، وخدنا قرار مشاركتها في 10 دقائق، وأنا وأحمد مكي اشتغلنا بـ إيدينا على ظهورها الأول، وصورنا مشهد ليلة الدخلة في يوم كامل، لأن ده لو نجح خلاص.
أحمد الجندي يعلق على انتقادات رحمة أحمد في الموسم السابع من مسلسل الكبير
كما علق أحمد الجندي، على انتقادات رحمة أحمد في الموسم السابع من مسلسل الكبير أوي، قائلًا: أول حلقة في الموسم اللي بعده رحمة اتبهدلت من التعليقات، مع أن أنا شايف أن هي عملت هو هو اللي عملته مفيش جديد وصوتها العالي هو هو.
