سعد سمير: مشيت ورا ضل بركات في الأهلي.. وقفلت التليفون في وجه الخطيب بسبب الخضة
كشف سعد سمير مدافع سيراميكا كليوباترا الحالي والأهلي السابق، عدة كواليس عن حياته الشخصية، مكالمته الشهيرة مع محمود الخطيب رئيس القلعة الحمراء.
أبرز تصريحات سعد سمير
وقال سعد سمير في تصريحات إعلامية: كنت بهرب من المدرسة وأنط من على السور علشان ألعب كرة، وفي نهائي إفريقيا 2006 بين الأهلي والصفاقسي كنت عايز اتفرج على المباراة لكن مش معايا فلوس، واستلفت من صاحبي جنيه علشان أروح القهوة.
وأضاف: الناس كلها مشيت من القهوة قبل الدقيقة 90 لكن أنا كنت عارف إن الأهلي هيسجل، وبالفعل أبو تريكة سجل هدف الفوز في وقت قاتل، وكانت فرحة جنونية، وكسرنا كراسي القهوة من الاحتفالات، وفي 2007 السنة التانية مباشرة انضميت لقطاع الناشئين بالأهلي، وفي 2008 لعبت مع اللاعبين اللي كنت بتفرج عليهم في التليفزيون، ولما حكيت لأبو تريكة الموقف أداني فلوس الكراسي.
وأردف: أول مقابلة مع لاعبي الأهلي الكبار كان فيه رهبة من أبو تريكة ووائل جمعة، لكن محمد بركات عقد مع الناشئين وقال أوضة اللبس ليها كبير واحد هو أنا لو مشيتوا وراه أيامكم هتكون كويسة، لو مشيتوا ورا اللاعبين التانيين أيامكم هتكون صعبة، ومن أول يوم مشيت ورا ضل محمد بركات في الأهلي.
وكشف سعد سمير كواليس المكالمة الأولى التي جمعته بالخطيب، معقبا: كنت لاعبا في منتخب الشباب والأهلي طلب ضمي إلى قطاع الناشئين ووقتها تواصل معي محمود الخطيب لكني أغلقت الهاتف في وجهه من الصدمة، وأعتقدت إنه مجرد هزار من أحد الأشخاص، وبعدها أتصل بيا عدلي القيعي وتأكدت أنه الخطيب، وعاود الاتصال بي مرة أخرى وقالي إني لاعب جيد ومحتاجين تكون معانا وبعدها معرفتش أنام في اليوم دا.
وتطرق سعد سمير للحديث عن محمد صلاح نجم ليفربول، قائلا: ناس كتير متعرفش إن محمد صلاح شخص متواضع جدًا بكل النجومية والنجاح اللي حققهم، والحياة بالنسبة له بسيطة.
واختتم سعد سمير تصريحاته قائلا: عُرض عليا العديد من الأعمال الفنية لكنها كانت لا تكتمل أو اعتذر بسبب ضيق الوقت، وكان أخرها مسلسل النص كنت سألعب شخصية لاعب كرة، وجلست مع أحمد أمين بطل العمل واتفقنا لكن بعدها تم تأجيل الفكرة بسبب صعوبة تنفيذها في تلك الحقبة.
