والدة ياسين لاعب ناشئي مصر تكشف تفاصيل مقتله على يد صديقه بالنزهة : نزل فيه ضرب لحد ما وقع وجاله نزيف| فيديو

حجزت المحكمة قضية مقتل الطفل ياسين لاعب ناشئي مصر المجني عليه على يد أحد اصدقائه المقربين وذلك للحكم يوم 29 يوليو الجاري.

 وقالت والدة الطفل ياسين عصام لاعب ناشئي مصر، في بث مباشر عبر القاهرة 24: " أن الواقعة حصلت في رمضان الماضي كان ياسين بيلعب كل يوم مع يوسف، كانوا شبه إخوات، بينهم عِشرة سنين، والفرق في السن كان بسيط، يوسف أكبر شوية بس كانوا متعودين يلعبوا كورة مع بعض، بس يوم الواقعة حصلت خناقة بينهم، وده عادي بيحصل بين العيال، لكن اللي حصل بعد كده كان فوق الخيال".

مقتل ياسين لاعب ناشئين مصر على يد صديقه بالنزهة 

وأضافت: "أخو ياسين الكبير، حمادة، تدخل قبل الفطار وصالحهم، وقالهم انتوا إخوات متزعلوش من بعض، وياسين قاله حاضر، وكان ناوي يروح يرضي يوسف بعد الفطار، وفعلًا خرج من البيت وقاله ما تزعلش مني".

وأشارت الأم: "ابني كان قلبه طيب ونيّته صافية، راح ليوسف عشان يرجع يلعب معاه زي كل يوم، لكن يوسف قاله استناني آخر الشارع، وهناك حصل اللي محدش يتخيله، طلعله فجأة، زقه جامد على الأرض، وضربه برجله في دماغه وصدره، وسابه مرمي ومشي".

وطالبت والدة المجني عليه ياسين وهي تبكي بحق ابنها بعد أن قررت المحكمة حجز القضية قائلة: "ابني مات واتدفن، لكن حقه لسه ما رجعش، وأنا مش هسكت لحد ما آخد حق ابني، ابني اتغدر بيه، دى مش خناقة عيال، دى جريمة.

واستكملت الأم: "فين التربية؟ فين الضمير؟ ابني كان بيراعي صاحبه وبيحبه، والتاني رماه وضربه لحد ما مات".