سميرة عبد العزيز: سميحة أيوب سندتني في بدايتي وخلتني أشتغل.. وجوازي كان بموافقتها
تحدثت الفنانة سميرة عبد العزيز، عن صديقة عمرها الفنانة الراحلة سميحة أيوب، موضحة أنها أول من ساعدها واستقبلها في المسرح القومي بعدما قدمها الفنان الراحل كرم مطاوع.
وقالت سميرة عبد العزيز، في لقائها مع القاهرة 24: كرم مطاوع هو اللي جابني المسرح القومي بعد ما شافني في الإسكندرية، وبتوع المسرح القومي زعلوا وقالوا ليه أنت جايب لينا واحدة من برا؟، واللي وقفت جنبي وسندتني وخلتني أشتغل ومحدش يتكلم سميحة أيوب، وأنا لما اشتغلت وبقيت عضوة في المسرح القومي مبقاش يهمني حد، ودخلت المعهد وبقيت الأولى على الدفعة لغاية ما اتخرجت.
وتابعت سميرة عبد العزيز، متحدثة عن عمق علاقتها بالراحلة سميحة أيوب: جوازي من محفوظ عبد الرحمن كان بموافقة سميحة أيوب، لما اتقدملي كان عندي بنت من جوازة سابقة وقلت عايزة أتفرغ للفن، وسميحة أيوب قالتلي ليه ما تتجوزي ليه تقعدي لوحدك وأنتي مش كبيرة، وده راجل محترم طالما فكر يتجوزك، وقالتلي ده مؤلف ومش هيمنعك من الفن وخليتنا نتقابل واتجوزنه في بيت سميحة أيوب واللي شاهد على عقد زواجي سعد الدين وهبة.
سميرة عبد العزيز: عمري ما هعتزل الفن
كما أكدت الفنانة سميرة عبد العزيز، أنها لا تفكر في اعتزال الفن، قائلة: أنا الحمد لله بفضل من ربنا وبشكره ألف شكر إني بصحتي وقادرة على العمل وبشتغل وبعمل كل حاجة في المسرح والإذاعة، وعمري ما فكرت في الاعتزال وهفضل أشتغل لغاية ما أقع على خشبة المسرح.
