اللي هيرحمك مني موتي.. فتاة تزعم تهديد خطيبها السابق لها بعد انفصالها عنه بالزقازيق
نشرت فتاة تدعي مريم محمد استغاثة من خطيبها السابق بزعم ابتزازه لها وتهديده عقب انفصالها عنه وتشهيره بها عبر مواقع التواصل الاجتماعي مدعية تشويهه لسمعتها.
فتاة تستغيث من خطيبها السابق بعد انفصالها عنه بالزقازيق
وزعمت الفتاة في منشور لها عبر موقع التواصل الاجتماعي فيسبوك: أنا بتعرض لتهديد وابتزاز وتشهير من الشخص اللي في الصورة دي، وبقول الكلام ده ومعايا كل الأدلة اللي تثبت كلامي قانونًا أنا كنت مخطوبة من حوالي سنة، وتم فسخ الخطوبة بعد ما اكتشفت إن الشخص اللي كنت مرتبطة بيه إنسان مؤذي وغير سوي، بعد فسخ الخطوبة، بدأت أتعرض لتهديدات وشتائم وابتزاز عن طريق رسائل واتساب ومكالمات صوتية – وكل ده معايا ومسجل.
وأضافت الفتاة في منشورها: قدمت ضده محضر رسمي في شهر سبتمبر سنة 2024 بعد ما استمر في إيذائي وطلب مني فلوس هو ووالدته – ومعايا أدلة كاملة تثبت ده. بعدها تم التواصل معايا من والدته اللي طلبت مني أسحب المحضر ووعدت إنه مش هيتعرضلي تاني، وبالفعل ماكملتش الإجراءات.
وادعت الفتاة في منشورها: لكن فجأة وصلتني منه رسالة بيهددني فيها ويقول: عملتيلي محضر؟ هوريكي أسود أيام حياتك، واللي هيرحمك مني موتي! وزعمت: بدأ يطلع عليّا كلام سيئ في الأعراض، كلام كذب وافتراء ينهش في سمعتي وشرفي وعملت محضر تاني شهر 10 سنه 2024
وزعمت: بعدها بدأ يعمل حسابات مزيفة وينشر صور وكلام مهين جدًا عني على جروبات الزقازيق وجروبات شغلي، وكل يوم تشهير جديد – حتى قفللي صفحة شغلي اللي أكل عيشي منها، وبعتلي الناس من الضرائب يؤذوني في لقمة عيشي. الأسوأ إنه نزل صوري على جروبات غير أخلاقية، وكتب كلام مهين جدًا عليها، وبدأ يرسل رسائل سيئة لأهلي وصحابي وناس ماتعرفنيش حتى! كنت فاكره إن الموضوع يخصني أنا بس، وإن الأذى اللي اتعرضت له كان استثناء لكن الحقيقة إن في ضحايا كتير غيري. الشخص ده مش بس بيشهر بالناس وبيبتزهم، ده طلع نصاب ومؤذي بشكل منظم. معايا كل الأدلة اللي بتثبت كلامي.
وادعت:المفاجأة إن فيه محضر معمول ضدي من شهرين بيقول إني أنا اللي ببعته تهديدات! وأنا اللي بشهر بنفسي إزاي؟! وأنا أساسًا حياتي بقت جحيم، وعندي شهود إنه بيجيلي في شغلي وبيتتبعني وبيحاول يوصللي وأنا بهرب منه لا وعلشان يبان إنه مظلوم وغلبان، بدأ يعيش دور الضحية بكل بجاحة
وأوضحت: أنا بكتب البوست ده مش علشان استعطف حد، لكن علشان أطلب حق قانوني، أنا معايا كل الأدلة من رسائل، تسجيلات، بوستات، صور، روابط الحسابات الوهمية، وكل ده متقدم في المحاضر الرسمية في مركز الزقازيق ومباحث الإنترنت، وفيه محامي بيتابع القضية أنا حالتي النفسية تعبت جدًا من اللي بيحصلي، بقت حياتي متوقفة، مش عارفة أشتغل ولا أعيش بشكل طبيعي من كتر الأذى والتشهير والافتراء.
وطالب مستخدمي موقع التواصل الاجتماعي بسرعة القبض على الشاب لاتهامه بالتعدي علي خطيبته السابقة والتشهير بها والتسبب بأذى لها.
