أب يستغيث من تعرض ابنته للعنف الزوجي.. ويزعم: جوزها يتعاطى المخدرات وحاول يقتلها أكتر من مرة

زعم والد سيدة في الإسكندرية، تعرُّض ابنته للعنف الزوجي، وأنه خلال سنوات الزواج تعرضت السيدة للضرب المبرح من زوجها، بسبب تناوله للمخدرات، ومحاولاته التخلص منها، حسب ما صرح به لـ القاهرة 24.

أب يستغيث من تعرض ابنته للعنف الزوجي  

وادعى يوسف نظير والد السيدة في تصريحات خاصة لـ القاهرة 24: بنتي من 2014 بتتعرض للضرب والعنف من زوجها، للأسف وقعت في واحد ميعرفش ربنا ولا يسمع عنه، معذبنا في حياتنا، من ساعة ما اتجوزت وهو معيشها في ضرب وإهانة هي وولادها الاتنين. 

وزعم: الراجل ده كل شوية يعملنا مشكلة وآخر مرة جه شتمنا وبهدلنا في الشارع والناس اتفرجت علينا عشان عايز ولاده يعيشوا معاه وعايز ياخدهم بالعافية وهو متعاطي للمخدرات ومعانا تقارير طبية بحالته والدكاترة قالولي حرام بنتك تعيش معاه، في مرة حط المطوة على رقبتها وقالها هقتلك أنتي وأمك وأبوكي. 

وأردف: بنتي لما جت قعدت معايا رجعت واحدة تانية لأنه كان معيشها في ضرب وتعذيب ومكنش بيصرف عليها ولا على ولادها ومن 2012 بنحاول نطلقها وبنتي لما لقت المصاريف كتيير عليا نزلت اشتغلت عشان تصرف على نفسها وعلى ولادها، ومن 3 أيام ضربني في صدري بالمطوة وأنا عندي قصور في القلب، دي عيلة مكنش المفروض تتناسب بس حظنا كده. 

وأكمل: بنتي متحملتش 14 سنة ضرب وإهانة وقلة مصاريف عليها وبياخد أي حاجة في الشقة يبيعها لأنه مش طبيعي، مرة كان عايز يرميها من فوق السطح بنتي كانت ضايعة مني 14 سنة ولقيتها.