بعد شائعات بيع إبراهيم شيكا أعضائه.. صديق اللاعب الراحل: ولاده وأهله تعبوا نفسيًا ومش هنسكت
شاركت هبة التركي، أرملة لاعب نادي الزمالك السابق إبراهيم شيكا، فيديو عبر حسابها الرسمي، استغاثت فيه بعد زعم مجموعة من الأشخاص وصناع المحتوى عبر منصة تيك توك للفيديوهات أن اللاعب إبراهيم شيكا لم يمت بسبب السرطان، وإنما لجأ إلى بيع أعضائه، من خلال شبكات متخصصة لتجارة الأعضاء ما أودى بحياته.
صديق ابراهيم شيكا يكشف تفاصيل استغاثة زوجته
وقال أحد أصدقاء لاعب نادي الزمالك السابق إبراهيم شيكا في تصريحات خاصة لـ القاهرة 24: الفيديو اللي هبة عملته على حسابها الشخصي ده عشان إحنا تعبنا من كلام صناع المحتوى اللي بيقولوا شيكا اتبرع بأعضائه قبل الوفاة، والموضوع انتشر أوي على التيك توك من ناس معروفه، وده خلى نفسيتنا في الأرض إحنا وولادهـ أنس ابنه نفسيته تعبانة جدا بسبب اللي بيتقال إن أبوه مامتش بالسرطان ومات بعد التبرع بالأعضاء.
وتابع: كل الناس اللي بتقول إن شيكا مات للسبب ده حسبي الله ونعم الوكيل فيكوا اتقوا ربنا، الطلب الوحيد الي نفسنا فيه إن سيرة ابراهيم شيكا تتقفل خالص من على السوشيال ميديا، يعني ميت بقاله 98 يوم ومش عارف يرتاح في تربته لسه روحه متعلقة بسبب كلام الناس عنه، ارحموه وارحمونا، حتى والدته كل ما تسمع الكلام اللي بيتقال تفضل تعيط، كفاية لحد كده، ومش هنسكت عن اللي بيتقال هناخد حقنا.
