آمال ماهر: وارد تشوفوني بفستان أبيض.. ومحدش طلب مني مغنيش ده مستحيل
ردت الفنانة آمال ماهر، على إمكانية زواجها مرة أخرى، بعدما ظهرت بفستان زفاف في كليب أغنيتها خبر عاجل، من ألبومها الجديد حاجة غير، مؤكدة أنها يمكن أن تتزوج إذا كان هناك شخص مناسب ولا تمانع من تكرار التجربة.
وقالت آمال ماهر، في لقائها بـ برنامج أجمد 7، عبر إذاعة نجوم FM: وارد تشوفوني بالفستان الأبيض ليه لأ، وأنا معنديش مواصفات اللي ربنا يجيبه كويس، أنا بس بدعي ربنا يرزقني بـ إنسان يتقي ربنا فيا.
وتابعت آمال ماهر: واللي عنده ثقة في نفسه مش هيشوف أني نجمة ويخاف من نجاحي، اللي عنده ثقة في نفسه هيحيب نجاح المرأة، ودايمًا العلاقات بيكون فيها تنازلات، ولكن المهم أنا متأثرش عليكي ولا على حياتك بالعكس تضيف، ومحدش طلب مني أني مغنيش ده مستحيل.
آمال ماهر تعلق على جدل لقب صوت مصر
كما علقت الفنانة آمال ماهر، على جدل لقب صوت مصر، قائلة: أنا مبحبش الكلام ولا اللغط في موضوع الألقاب، لأن أنا ممكن أكون رقم 1 عند حد وممكن أكون ولا حاجة عند حد تاني، فبأي حق أقول أنا رقم واحد؟ وأنا صوت إيه، الناس هي اللي بتقيم وهو اللي بيدي اللقب للمطرب، وأنا بحب اسمي جدًا وبالنسبة ليا أن الناس حباه وعارفاه دي حاجة اتشرف بيها،، واللي أنا عارفاه كويس أوي أني بحب اسم آمال ماهر، أنا هعوز إيه أكتر من أن الناس شايفاني أميرة قلوبهم.
