مكنتش مصدقة”.. سلمى أحمد الأولى على أدبي من الدقهلية: النتيجة هدية من ربنا

سيطرت أجواء من الفرح والبكاء والذهول داخل منزل أسرة الطالبة سلمى أحمد السيد إبراهيم السيد طه، ابنة محافظة الدقهلية، فور إعلان وزارة التربية والتعليم عن حصولها على المركز الأول في الثانوية العامة – الشعبة الأدبية، بمجموع 318 درجة من 320.

مكنتش مصدقة”.. سلمى أحمد الأولى على أدبي من الدقهلية: النتيجة هدية من ربنا

وقالت سلمى، في أول تعليق لها بعد معرفة النتيجة: “مكنتش مصدقة.. أول ما اتقال لي إن اسمي طلع ضمن الأوائل، قولت يمكن تشابه أسماء، ولما اتأكدت، حسيت إن ده رزق ونعمة من ربنا، وتعب سنة كاملة ما ضاعش”.

وأضافت: “كنت بذاكر أول السنة حوالي 4 ساعات يوميًا، ولما قربت الامتحانات بقيت أذاكر 6 و7 ساعات، لكن كان أهم حاجة عندي إني أذاكر بهدوء ومن غير توتر”.

وأشارت إلى أن حلمها هو الالتحاق بكلية الألسن: “بحب الأدب جدًا، خصوصًا الأدب الروسي، ونفسي أدرس لغات وأترجم، وده كان هدفي طول السنة”.

من جانبها، لم تتمالك والدة سلمى دموعها خلال حديثها في لايف تلفزيوني، وقالت: “فضلنا طول الليل ندعي، وكنا قاعدين قدام التلفزيون مستنيين النتيجة، ولما جت مكالمة من صحفية بتقول إن بنتي طلعت الأولى، قلبي وقف، وفضلنا نعيد المكالمة تاني وتالت علشان نصدق”.

وأضافت الأم: “فرحتنا متتوصفش.. سلمى طول عمرها شاطرة، من أولى ابتدائي وهي من الأوائل، ومفيش مرة جابت فيها أقل من المركز الأول، وكانت دايمًا بتذاكر وتصلي وتقول: ربنا مش هيضيع تعبي”.

وأكد والد سلمى أن التفوق لم يكن وليد لحظة، قائلًا: “كنا واثقين إنها هتطلع من الأوائل، بس ماكنّاش متخيلين إنها الأولى على الجمهورية، ربنا عوّضها عن كل لحظة تعب وسهر”.