سيدة تستغيث من هجمات الكلاب الضالة: اتعضيت وأنا رايحة الشغل.. وناس كتير بتتأذي بسببها
أطلقت سيدة تُدعى سهر سيد، إحدى سكان مدينة السادات، استغاثة عاجلة عبر مواقع التواصل الاجتماعي، مطالبة جهاز مدينة السادات بسرعة التدخل للحد من ظاهرة الكلاب الضالة التي باتت تهدد سلامة المواطنين، صغارًا وكبارًا، في مختلف مناطق المدينة.
سيدة تستغيث من هجمات الكلاب الضالة بمدينة السادات
وقالت سهر خلال حديثها لـ القاهرة24: أنا في المنطقة العاشرة بمدينة السادات ورايحة الشغل في أمان الله، لقيت كلب هجم عليّا وعضني في رجلي من ورا، وأنا مشوفتوش.. ودلوقتي أتصبت في رجليا الاتنين وتعبانة، وباخد المصل للعلاج.
وأضافت: أخدت جرعتين وباقي 3 جرعات، حسبي الله ونعم الوكيل إحنا في معاناة، ولادنا بقوا مرعوبين ومش قادرين ينزلوا من البيت، ومفيش حد بيتحرك ولا بيشوف شغله.
سيدة تستغيث: عايزة أتقدم ببلاغ رسمي
وأكدت السيدة أنها تعتزم تقديم شكوى جماعية لجهاز المدينة، قائلة: أنا عايزة أتقدم ببلاغ رسمي وأجيب حقي، لأن فيه ناس كتير بتتأذي من الكلاب الضالة اللي في المنطقة مش هينفع السكوت أكتر من كده، عايزين تحرك سريع يحمي الأهالي من الخطر ده.
وتأتي هذه الشكوى وسط تزايد شكاوى سكان مدينة السادات من الانتشار الكبير للكلاب الضالة، مطالبين بحلول عاجلة تحفظ الأمن والسلامة في الشوارع، وتقي الأطفال وكبار السن من المخاطر اليومية.
