هي اللي ضربت نفسها.. أول تعليق من عمة الطالبة بسملة صاحبة استغاثة الطرد في الزقازيق | خاص
ظهرت الطالبة بسملة في فيديو مؤثر تستغيث وشقيقها بالتزامن مع إعلان نتيجة الثانوية العامة بسبب طرد أسرتها لها من منزل العائلة، ومن جانبها نفت عمتها ما ورد في الفيديو، مؤكدة أن الأسرة لم تطرد بسملة، وأن ما حدث ليس كما تم تصويره على وسائل التواصل الاجتماعي.
أول تعليق من عمة الطالبة بسملة صاحبة استغاثة الطرد في الزقازيق
وقالت العمة في تصريحات لـ القاهرة 24: إحنا مطردنهاش، وبصراحة أنا مكنتش موجودة في البيت وقتها، لأن أنا مش عايشة معاهم أصلًا.
وأضافت: بسملة عملت مشكلة كبيرة لأبوها اتسببت في فصله من وظيفته، وده كان سبب الأزمة كلها، ونفت العمة أن يكون والد بسملة أو جدها قد اعتدوا عليها بالضرب، قائلة: أبوها مش مقيم معاها أساسًا، هيضربها إزاي؟ وهي اللي ضربت نفسها عشان تتهمهم ظلم.
وأشارت إلى أن الطالبة كانت على خلاف مستمر مع أسرتها بسبب رغبتها في الخروج دون قيود، مُضيفة: جدها عنده 73 سنة وجدتها 60 سنة، هي تقول اللي هي عاوزاه.. هي قاعدة فوق في شقة والدها وجدتها بتعملها الأكل.
وتابعت: جدتها صوتها ظهر في الفيديو وقالت لها مش عايزينك في بيتنا، عشان عملت في جدها محضر وفي أبوها والناس كلها عارفة المشكلة بتاعتها.
تعليق للطالبة بسملة صاحبة استغاثة الطرد بسبب نتيجة ثانوية عامة
ومن جانبها، كشفت الطالبة بسملة في تصريحات خاصة لـ القاهرة 24، ملابسات تعرضها للعنف الأسري الشديد من الجد والأب وزوجة الأب، بعد أن قامت والدتها بـ خلع والدها، قائلة: طردوني الساعة 3 الفجر، وأبويا بينتقم من أمي فينا عشان هي خلعته، قالي أنا هنتقم من أمك فيكي وهقتلك.
وأضافت: حاليًا أنا هربانة منه وعاملة محضر وهجيب حقي بالقانون، اتعرضت للضرب والعنف لمدة سنوات، دايمًا بياخد فلوسي وتليفوني وأي حاجة أمي تبعتهالي عشان يشرب بيها مُخدرات، قبل ظهور النتيجة بـ يوم اعتدى عليا، وجدي خنقني وكان هيقتلني.
تابعت: طلبت له الشرطة وعملت محضر، ولما رجعت على البيت أنا كنت مرعوبة من أبويا لحسن يقتلني زي ما كان بيهددني، لقيتهم رافضين دخولي البيت أصلًا، ومش عايزين يدخلوني وجدتي تشتمني بألفاظ خارجة وتقولي لأ أنا معرفكيش خليكي في الشارع.
