حسين الشحات: الأهلي حياتي وأتمنى حصد أفضل لاعب في إفريقيا
تحدث حسين الشحات لاعب فريق الكرة الأول بالنادي الأهلي عن الفترة الماضية، وطموحاته خلال الفترة المقبلة مع الأحمر.
تصريحات حسين الشحات
وقال حسين الشحات في تصريحات تليفزيونية: محمد يوسف كان المدير الفني للفريق لما سجلت أول هاتريك لي مع الأهلي وعلاقتي به كبيرة.. بصراحة يقوم بعمل رائع في الفترة الحالية ويتحدث مع كل لاعب على انفراد ليشرح له كيف تسير الأمور وما الذي ينقصه وبصراحة هو بمثابة الأخ الكبير لنا في النادي حاليًا.
وأضاف: أنا طلعت وقلت، لو أنا همشي فده معناه إن النادي هو اللي عايز يمشيني، لكن أنا موجود أهو في النادي الأهلي، واللي ربنا كاتبه هو اللي هيكون.
وأشار حسين الشحات في تصريحاته: أحلى حاجة في الدنيا كانت وجود والدتي معايا وأنا بجدد عقدي مع الأهلي، وأنا في الأهلي بدعوات أمي.
وأردف: أنا دايمًا بقول إني واحد من الجمهور وأنا من منطقة شعبية واتربيت على حب جمهور الأهلي ده لأنه حماية دايمًا بقول إن اللي ملعبش كورة في الشارع ملعبش كورة خالص وبعد عمر طويل سواء اعتزلت في الأهلي أو انتقلت لنادي تاني في المستقبل فأنا بعد عمر طويل هكون في المدرجات مع الأهلي على طول.
وأوضح حسين الشحات في تصريحاته: أنا بزعل اوي لما حد يشتم أمي أو زوجتي او اخواتي.. هما ذنبهم ايه ؟ عملولك ايه عشان تشتمهم؟ اه ممكن ازعل من أي مشجع لو شتمهم وأتضايق جدًا.
وعن أجمل جملة قيلت له من مدرب، أجاب: إيهاب جلال كان دايمًا يقول لي صدق إنك لاعب كبير وإنك هتلعب على أي حد موجود سواء كنت في المقاصة أو في أي نادي تاني.
واستمر في تصريحاته: جائزة أفضل لاعب في القارة هي الجائزة التي يحلم بها كل لاعب، وأتمنى حصدها، وكنت شايف إني أستاهلها في فترة من الفترات، وكمان مصطفى شوبير كان يستحقها في السنة الماضية، ونفسي أحقق كأس العالم للأندية مع الأهلي.
وعن الفرصة الأخيرة في مباراة إنتر ميامي، أوضح الشحات: حزنت على إهدار الفرصة الأخيرة في مباراة إنتر ميامي، وأنا لا أعرف ماذا حدث، وكنت أفكر إما تمريرها لـ أفشة أو لـ طاهر، وبالتالي خرجت بالشكل هذا بعد أن تأخرت، وبتحصل في العالم كله مفيش مشكلة، واحنا اليوم دا مكناش موفقين، ولكن الكرة لم تكن تريد أن تدخل، وأنا مستحيل أخسّر فريقي في كأس العالم للأندية، واحنا المباراة التانية خسرنا فـ هي بتبقى حاجة من عند ربنا، أنا كنت عايز نكسب عمري ما هتمنى أخسّر فريقي، مش قصة كدة، انت نسيت كل حاجة حصلت في مباراة ميامي وافتكرت كرة حسين؟ كان ممكن ألعبها وتضيع لأن ربنا أراد إنها تضيع.
وواصل: بطولة إفريقيا 2020 هي الأقرب لـ قلبي مع نهائي الوداد 2023.. وأكتر وقت اتطمنت فيه في مباراة القاضية لما ابننا زيزو دلوقتي شاط في العارضة قولت الحمد لله شكلها لينا.
وشدّد الشحات: كان نفسي ألعب مع الماجيكو أبو تريكة لو هنتكلم علي أبو تريكة هنقعد للصبح كان نفسي ألعب معاه يعملي اسيست بس أبو تريكة محبوب من الشعب المصري كله والعالم العربي بالكامل أبو تريكة تحبه انسانيًا قبل ما تحبه كلاعب كورة 100 مليون مصري بيحبوا أبو تريكة وهيفضل محبوب في أي مكان.
وتابع لاعب الأهلي تصريحاته قائلًا: أنا بحب أنفذ تعليمات المدرب على طول كل مدرب بييجي وليه طريقة مختلفة عن التاني والمدرب اللي بعده بيطلب حاجات تانية وأنا بنفذ كل حاجة بيتقالي أكتر مدرب كان مديني حرية كان فايلر والمدرب الحالي ريبيرو مدرب هجومي بشكل كبير جدًا وده أنا بحبه جدًا مع أي مدرب.
وأتم تصريحاته قائلًا: طول ما جمهور الاهلي معانا في ضهرنا هنحقق كل البطولات.
