طول الطريق بيتخانق ويشتم ورفض توصيلي.. فتاة تستغيث من سائق تاكسي بالهرم

استغاثت فتاة من سائق تاكسي بعد تعرضها للاعتداء اللفظي وسيل من الشتائم خلال ذهابها لمنطقة الهرم، بجانب توقف السائق المفاجئ في منتصف الطريق ورفض توصيلها.

فتاة تستغيث من سائق تاكسي بالهرم 

وقالت الفتاة في تصريحات خاصة لـ القاهرة 24: ركبت تاكسي عادي زي ما بركب مع أي سائق وقولتله عايزة أروح من محور كمال عامر وأنا عارفه الطريق عشان أسرع شوية، واتفاجئت أنه طول الطريق يكرر جملة ده طريق تقيل وأنتي بتدخلي في شغلي ليه، وعمال يهبد على الدريكسون ويقل أدبه بكلام مش هقدر أقوله، وأنا كل ده مفتحتش بوقي معاه وساكته عشان أوصل بس.

وتابعت: لحد ما قربت أوصل لقيته فجأة وقف التاكسي وشال المفتاح وقالي أنا مش هكمل لأن طريق حضرتك طويل وأنا متفقتش على كده وده مش طريق اللي أنا عايزه، قولتله بس أنا لسه موصلتش وبعد إذنك اتحرك قالي مليش دعوة وفضل يزعق ويعلي صوته عليا بطريقة بلطجة قولتله طب شوف اللي أنت عايزة وأنا هدفع ده طبعا بعد ما وقف بيا شوية وبعد ما تحايلت عليه.

واستكملت: لما وصلني نزلت صورت رقم العربية فهو طلع خبط فوق العربية جامد وقالي لو عايزة تصوريني صوريني أنا مش بخاف وألقى سيل من الشتائم.