الشركة المسؤولة عن الألعاب النارية في حفل محمد رمضان: التصاريح كاملة.. واللي حصل قضاء وقدر
قالت منة حاتم، مسؤولة بالشركة المنفذة لفقرة الألعاب النارية بحفل الفنان محمد رمضان في الساحل الشمالي، إن ما حدث لم يكن نتيجة أي إهمال أو تقصير من جانب الشركة، مؤكدة أن التصاريح اللازمة كانت مستوفاة بشكل كامل، وأن كافة تجهيزات السلامة تم اتخاذها قبل الحفل بوقت كافٍ.
حفل محمد رمضان
وأضافت منة حاتم لـ القاهرة 24: اللي حصل مش طبيعي ولا متوقع إحنا بنتعامل مع أنابيب CO2 وهي عبارة عن هواء ثلج، مش نار فعلية الانفجار اللي حصل كان نتيجة انفجار أمبوبة بطريقة غريبة جدًا، ونعتبره قضاء وقدر.
وأكدت أن الشركة لها سجل طويل من العمل في تنظيم الحفلات، قائلة: "دي مش أول مرة نشتغل فيها مع محمد رمضان، يمكن دي تالت أو رابع حفلة وكمان اشتغلنا قبل كده مع تامر حسني، حمادة هلال، رامي صبري، وعدد كبير من الفنانين في أماكن مشهورة زي الساحل والشيخ زايد.
وأوضحت أن برنامج الألعاب النارية يتم وضعه بدقة وبمعايير أمان مشددة: البروجرام بيكون معمول قبل الحفل بكذا يوم، والسيفتي بيتراجع بنسبة 100% علشان نضمن إن مفيش حاجة تحصل حتى النار اللي بتظهر في العروض بتكون محسوبة ومؤمنة.
وأعربت مسؤولة بالشركة المنفذة لفقرة الألعاب النارية بحفل الفنان محمد رمضان في الساحل الشمالي عن حزنها الشديد لوفاة الشاب حسام، أحد أعضاء الفريق الفني، قائلة: حسام كان شخص جميل جدًا، وكان جزء من عيلتنا إحنا بنعتبر الفريق اللي معانا مش مجرد موظفين، دول أهل، وأهاليهم يعرفونا كويس.
واختتمت أن التأمين كان كاملًا سواء للفنان محمد رمضان أو الجمهور، وأن ما حدث لا علاقة له بأي خلل تقني أو سهو في إجراءات السلامة: كل حاجة كانت مؤمنة تمامًا من الأسلحة الترفيهية المستخدمة، لتجهيزات السلامة، وحتى التنسيق مع الجهات المعنية اللي حصل هو قضاء من ربنا، وربنا يرحم حسام ويصبر أهله.
