مش بالمكان!
فيه ناس كتير فاكرة إن الأمان بييجي من المكان.. من إنك تعيش في بيت كبير، أو منطقة هادية، أو مدينة نظيفة، أو حتى بلد بعيدة عن المشاكل، بس الحقيقة اللي اكتشفتها مع الوقت، إن الأمان مالهوش أي علاقة بالمكان قد ما هو له علاقة بالناس اللي معاك، ممكن تبقى في آمن مدينة في العالم، ومع ذلك قلبك قلقان ومتوتر ومش قادر تنام، وممكن تبقى في وسط دوشة وزحمة وصوت كتير، لكن وجود شخص معين جنبك يخلي الدنيا كلها تبان بسيطة وسهلة.
الأمان الحقيقي مش بييجي من بيوت ولا الأبواب المقفولة، ولا حتى من الأمان المادي أو في أي حاجة مادية كمستوى بقى أو كفلوس، لكن بييجي من الإحساس إن في حد شايلك في قلبه، حد لو الدنيا اتبدلت وجت عليك، عارف إنه هيفضل ثابت ومش هيسيبك.
الأمان يعتبر حالة أكتر ما من كونه مكان أو مستوى بتوصل له في حياتك، هو الكلمة اللي بتتقال لك وقت الخوف، والضحكة اللي تيجي في وشك وانت خلاص قربت تنهار، والهدوء اللي بينتقل لك من مجرد وجود حد جنبك.
جوة كل واحد فينا مواقف كتيرة تحكيله وتوضح له يعني إيه أمان فعلًا، فيه مواقف قادرة تشرح لك وتفهمك مفهوم الأمان الحقيقي، تفهم من خلالها الأمور بشكل أوضح وبصور أحسن، تعرف منها إن يمكن كان فيه حقايق غايبة عنك، أنك كنت فاكر الأمان في فلوس أو مكان، لكن طلع فيك وفي قلب صادق معاك.
الأمان يا صديقي مش بس شعور، الأمان حالة روح.. حالة بتتخلق لما تبقى وسط ناس بتحس معاهم إنك مش محتاج تمثل ولا تتظاهر بالقوة، ناس لو شافوك وانت ضعيف مش هيستغلوك، ولو شافوك بتقع هيمدوا إيديهم يشدوك من غير ما يطلبوا منك مقابل.
المكان ممكن يغير شكله، والمدينة ممكن تبقى مش هي هي، لكن الشخص اللي بيديك إحساس الأمان لو اختفى، حتى لو كنت في احسن واعلى مكانة، هتحس إنك تايه، وده يمكن اللي بيخلينا نتعلق ببعض الناس بشكل مش منطقي، لأننا ببساطة لقينا معاهم إحساس بندور عليه طول عمرنا.
وفي الآخر، يمكن الأمان مش بييجي من مكان محدد ولا من ظروف مثالية.. الأمان بييجي من القلوب اللي بتطمنك من غير ما تقول كلمة، ومن العيون اللي تبص لك وكأنها بتقول: إنت تمام طول ما أنا وأنت هنا.
