مخدتش فلوسي ومش معايا جنيه.. شاب يستغيث بعد فصله من بلبن: مضيت على الاستقالة في عقد التعيين | خاص
استغاث شاب بعد فصله تعسفيًا من سلسلة محلات بلبن، بالإضافة لـ عدم حصوله على مستحقاته المالية وتقليص الشركة لـ راتبه خلال آخر شهرين عمل له، رغم عمله مدة 12 ساعة متواصلة وأدائه مهاما خارج اختصاصاته.
شاب يستغيث بعد فصله من بلبن: مضيت على الاستقالة في عقد التعيين
قال الشاب في تصريحات خاصة لـ القاهرة 24: الشركة ديه أسوأ شركة في مصر، وحقيقي حسبي الله ونعم الوكيل فيهم، عشان أنا من ساعة الفصل اللي حصل؛ وأنا قاعد في البيت، ومش معايا جنيه في بيتي حتى أنزل أدور على شغل تاني، أنا عندي 28 سنة ومتجوز بقالي 3 سنين، ومعايا طفل عندو سنتين ذنبوا إيه هو وأمه عشان يحصل فيا كده.
وأضاف: شوفت معاهم شغل محدش يتوقعوه أو يحصل في بشر أبدًا، شوفت معاملة زي الزفت، وغير كده مخدش آخر فلوسي بعد ما فصلوني كان بيتمسح بيا الأرض في الشغل معاهم حرفيا، ويا ريت كنا بنلاقي تقدير، بالعكس آخر شهرين خدت مرتبي مخصوم منه 2000 جنيه، وكنت بشتغل لـ 12 ساعة مع أن ساعات العمل بتاعتي 8 بس، غير إني كنت بعمل كل حاجة ليها علاقة بالنظافة مع إن شغلي تغليف وتجهيز الطلبات.
واختتم: وبالنسبة للعقد اللي مضيته أول ما تعينت هو عقد مؤقت شبة استقالة مبكرة؛ لأن مكتوب فيها أن من حق الشركة فصل العامل في أي وقت، يعني مضيت على الاستقالة في عقد التعيين، وكل اللي في دماغي أنا وزمايلي إننا نمضي عشان نازلين نأكل عيش.
