طبيب مقيم بمستشفيات جامعة المنيا يستغيث: قدمنا استقالاتنا ورافضين يمشونا.. ومستقبلنا واقف
استغاث طبيب مقيم بمستشفيات جامعة المنيا، من تعنّت الإدارة في رفض استقالته هو وزملائه، حيث يرفضون تركهم يرحلون عن العمل، مشيرّا إلى أن مستقبله هو وزملائه متوقف الآن بسبب ذلك.
وقال أحد الأطباء في منشور عبر حسابه على فيسبوك: إحنا أطباء مقيمين بمستشفيات جامعة المنيا بمختلف الاقسام، إحنا مقدمين استقالاتنا من شهر 7 السنة اللي فاتت ومازالت الاستقالات مقفولة ومانعينها.
استغاثة طبيب بمستشفيات المينا
وأردف: روحنا اشتكينا في مجلس الوزراء، وفي النيابة الإدارية، في وزارة التعليم العالي، وفي إدارات تكليفنا، ورفعنا قواضي وكل شويه بتتاجل، ولم يكن هناك حل، والجامعة رافضة استقالتنا باي شكل، مش فاهمين أزاي عايزين يشغلوا حد بالإجبار.
وتابع الطبيب: إحنا انقطعنا أكتر من سنة ومبينزلش لينا مرتبات ومننا ناس متجوزة وعايزين مصاريف ولا عارفين نشتغل في أي مكان ومستقبالنا واقف وعلي طول محولينا شئون قانونية، ومعلقينا أكتر من سنة مش راضيين يخلولنا والناس اللي رجعت واشتغلت اهانوها واتعنوا معاها وعاملوها اسوء معاملة.
وأختتم رسالته: مش عارفين نلجأ لمين علشان ناخد أبسط حقوقنا، أو نشتكي لمين، إحنا عايزين نمشي نظرا للتعامل السئ وظروف العمل الغير آدمية ومننا ناس ادمرت نفسيا، يا جماعة ساعدونا نمشي مش عارفين نستقيل.
