مصطفى جاد: أزمة أحمد حلمي انتهت بعد مكالمتنا.. وعمري ما خدت تقييمي من حد
علق المنتج والملحن مصطفى جاد، على الجدل الذي أثير حول أزمته مع الفنان أحمد حلمي، عقب انتشار مقطع فيديو خلال الفترة الماضية ظهر فيه حلمي وهو يوجه له جملة مصري وصف أول؟! خلال إحدى العروض المسرحية في المملكة العربية السعودية، ما أثار تفاعلا واسعا على مواقع التواصل الاجتماعي.
مصطفى جاد: أزمة أحمد حلمي انتهت بعد مكالمتنا.. وعمري ما خدت تقييمي من حد
وقال مصطفى جاد، في لقائه مع القاهرة 24: أنا مش عايز أقول كلام يستفز الناس، بس والله العظيم الموضوع مخدش مني غير المكالمة اللي حصلت بيني وبين أحمد حلمي علشان الموقف، ومدة الفيديو اللي صورته علشان أرد غيبة الراجل، أكتر من كده مفكرتش في الموضوع دقيقة، أنا عمري ما خدت تقييمي من حد فمش هشغل بالي الناس بتقول إيه.
وأضاف: أنا مش هرد على الموضوع ولا هقيمه كحدث لأن هو جه من السوشيال ميديا، وأنا بتعامل معاها طول الوقت كـ أداة من أدوات تسويق شغلي كمنتج أو ملحن، غير كده متهمنيش في حاجة، الموضوع وقتها كان مولع الدنيا ومحدش فاكره دلوقتي.
وواصل: من نفس المنطق بتاع أني مبيفرقش تقييم حد ليا، بمنتهى البساطة هي مش ثقة ولا غرور ولكن محدش يعرف تفاصيلي ولا إمكانياتي، وحد بيكتب رأيه عليا مكونه على أساس إيه؟، شوية حاجات كدابة عن طريق السوشيال ميديا ومتعرفش أنا إيه، الموضوع بالنسبة ليا أبسط بكتير من ما الناس شايفاه، لأن ولا الموقف ده ولا 100 موقف هيقيموا مين هو مصطفى جاد، ولا أي شخص تاني.
واختتم مصطفى جاد: نصيحتي لو يحق ليا أني أنصح حد، متتعلقش أوي بمدح الناس ليك لأن من عاش بمدح الناس مات بذمهم، اشتغل وأنجح واتبسط بنجاحك مع الدائرة القريبة منك لأن صاحب وحبيب الكل مالوش أصحاب.
