نصف كيلو ذهب و3 حسابات بنكية.. ننشر اعترافات سارة خليفة في قضية المخدرات الكبرى | خاص
يستكمل القاهرة 24 نشر نص التحقيقات في قضية اتهام سارة خليفة باشتراكها في عملية تصنيع وترويج وبيع المواد المخدرة، وكذلك تهريبها خارج مصر، بالاشتراك مع تشكيل عصابي مكون من 27 متهمًا، بينهم منتج وصاحب شركة ومقاولون وباعة وسائقون وغيرهم، ما ترتب عليه ضبطهم وإحالتهم إلى محكمة الجنايات.
تحقيقات قضية سارة خليفة في قضية المخدرات
وجاءت اعترافات سارة خليفة خلال التحقيقات في قضية المخدرات الكبرى، في القضية رقم 6863 لسنة 2025 جنايات التجمع الأول والمقيدة برقم 1347 لسنة 2025 كلي القاهرة الجديدة، وبسؤالها من قبل جهات التحقيقات المختصة، حول ما هي بيانات حساباتها البنكية؟، أجابت: عندي حساب بالدولار وحساب بالمصري وعندي حساب توفير عادي.
وجاء نص التحقيقات كالآتي:
س: وما هي تفاصيل أرصدتك بتلك الحسابات؟
ج: حساب بالجنيه المصري مش يستخدمه عشان تحويلات إنستاباي ويمكن يكونه فيه 70 أو 80 ألف جنيه بالكتير وبالنسبة للحساب الدولاري في نفس البنك في حوالي 3 آلاف دولار وحساب المصري فيه حوالي 800 ألف جنيه.
س: ما إجمالي الأرصدة البنكية؟
ج: حوالي 150 ألف جنيه.
س: هل من ثمة ادخارات مالية أخرى؟
ج: أنا معنديش فلوس برة تانية في البنوك واللي عندي دهبي حوالي 500 جرام دهب من ضمنهم الذهب اللي اتعرض عليا.
س: هل تمتلكين فواتير شراء قطع الحلي محتوى الحرز السابق؟
ج: أيوة.
س: وما قولك في عدم تناسب إجمالي دخلك الشهري المقدر 500 ألف جنيه تقريبًا مع أرصدتك البنكية التي لا تتجاوز 950 ألف جنيه؟
ج: أنا بصرف كتير.
س: ما هي أوجه إنفاقاتك اليومية والشهرية؟
ج: أولا أنا عايشة ما بين دبي ومصر وبصرف يوميًا المصاريف الشهرية أكل وشرب وكهرباء وبصرف على نفسي وشهريًا عندي صيانات وإيجارات، وعندي مصاريف مدارس ولاد إخواتي سنويًا، وأنا بدفعلهم نصف مصاريف المدرسة، وأخويا محمد أنا اللي بصرف عليه كل حاجة إيجار شقته في القاهرة الجديدة 20 ألف جنيه، وبدفع مدارس أولاده الثلاثة بالقسط على مدار السنة والثلاثة مصاريفهم 600 ألف جنيه في السنة غير المدرسة، وبصرف عليه في بيته وفي أكله وشربه لأنه بيشتغل معايا في الحفلات في دبي، والمرتب مش بيكفيه وأقساط لشقة أنا اشتريتها في التجمع قسطها 300 ألف كل 3 شهور وفيه دفعات كل 6 شهور.
س: وما مقدار تلك النفقات اليومية والشهرية؟
ج: حوالي من 100 ألف إلى 150 ألف جنيه شهريًا
س: وما صلتك بالسيارة ماركة هيونداي توسان سوداء اللون والسيارة ماركة رانج روفر؟
ج: العربية الرانج روفر بتاعت ماما والعقد بتاع العربية موجود في العربية، والعربية التوسان بتاعت زوج أختي والعقد بتاعها موجود.
س: وما سبب وجودها في حوزتك؟
ج: لأن والدتي عايشة معايا وبستخدم سيارتها وجوز أختي كان بايت عندنا وبستخدمها ساعات ولكن نادرًا.
س: وما صلتك بالعقار الموجود في العجوزة بمحافظة الجيزة؟
ج: دي شقتي وأنا عايشة فيها وهي شقة إيجار.
س: وهل يرافقك ثمة أشخاص في ذلك العقار؟
ج: أنا وماما وبابا عايشين فيها ومعايا شغالات بس إحنا عندنا شقة ثانية إيجار وماما وبابا مستقرين في الشقة في الدور الثالث.
س: سبق وقررتي بالتحقيقات وجود كاميرات مراقبة بداخل الشقة السكنية خاصتك؟
ج: عشان الشغالات سرقوني قبل كدة.
س: وما هي مواضع تلك الكاميرات بداخل الشقة تحديدًا؟
ج: كل الشقة فيها كاميرات وكل أوضة فيها كاميرا وعلى باب الشقة والريسبشن والدريسنج وأوضة النوم والطرقة والمطبخ.
س: ذكرت سلفًا بالتحقيقات أن تلك الكاميرات ترسل إشارتها إلى جهاز مستقبل بمدينة دبي بالإمارات فما سبب ذلك؟
ج: لأن سيستم الكاميرات اللي أنا شاريها مصدر السيستم في دبي في شقتي.
س: وهل تتملكي عقار بمدينة دبي؟
ج: لا هي شقة إيجار.
س: ومن تحديدًا باستطاعته الوصول إلى محتوى تلك الكاميرات؟
ج: أنا بس من الموبايل بتاعي.
