رشت حاجة في وشي وبعدها أغمى عليَّ.. فتاة تزعم محاولة سيدة اختطافها خلال استقلال ميكروباص بالإسكندرية |خاص
تصدر حادث تعرض فتاة من محافظة الإسكندرية لمحاولة اختطاف تريند مواقع التواصل الاجتماعي خلال الساعات القليلة الماضية، حيث زعمت الفتاة أنه خلال استقلالها ميكروباص من منطقة الهانوفيل، جلست سيدة بجوارها وحاولت تخديرها من خلال رش مادة غريبة في وجهها، مادفع الفتاة للجلوس بجوار السائق لطلب المساعدة.
فتاة تزعم محاولة سيدة اختطافها أثناء استقلالها ميكروباص بالإسكندرية
وقالت آية عبده في تصريحات خاصة لـ القاهرة 24: أنا ركبت إمبارح من الهانوفيل مشروع منشية والمشروع كان فيه ٤ أفراد وبدأ يحمل من البيطاش وست شكلها غريبة ركبت من نفس المنطقة، وهي شكلها متسولة وقعدت في الكنبة اللي ورا خالص وبعدين جت قعدت جنبى رغم إن كان فيه أماكن كتير فاضية وخدرتني، رشت حاجة على وشي، ومالت عليا قالتلي متخافيش.
وتابعت: أنا لولا ستر ربنا بعدت بسرعة وقاومت لأني عارفة ريحة البنج قولت للسواق على جنب ونزلت من المشروع من كتر الخوف كنا كده وصلنا الورديان وأول ما حطيت رجلي ع الأرض لقيت نفسي شبه بتشل جسمي بيبدأ ينمل ودماغي تقلت ومش عارفة أتكلم لساني تقل ومقدرتش أنزل طبعا، وقولت للسواق افتح الباب خدني جنبك هنا.
وتابعت: وكان في واحد راكب جنبه قولت للسواق أبوس إيدك خليك جنبى لحد ما أفوق أنا اتخدرت قالي اللي راكبة ورا وبعد كده محستش بنفسي، قولتها والفون كان في إيدي وشنطتي وبجد ربنا يجازيه خير مسك الست هو و2 من الركاب كانوا شهود وبجد محدش فيهم سابني لحد ما روحنا القسم ولحد النيابة الست طلعت مسجلة خطر.
