محمد ثروت: مينفعش الفنان يكون أعلى من الناس.. والعالم العربي متربي على اللهجة المصرية
تحدث الفنان محمد ثروت عن فكرة تواضع الفنان رفقة جمهوره، بجانب الحديث عن تعاونه مع الفنان تامر حسني في فيلم ريستارت، وتجربة فيلم روكي الغلابة رفقة الفنانة دنيا سمير غانم.
وقال محمد ثروت، في تصريحات إذاعية: الفنان بحس إنه لازم يكون من الناس لأنه طالع منهم، من وجهة نظري الفنان مينفعش يكون أعلى من الناس، ولازم ينزل تحت خالص علشان يشوف الناس الحقيقية اللي هو انعكاس ليها وأخلاقهم وضحكهم وحياتهم.
وأضف: لازم يشوف كل ده قبل ما يطلع على الشاشة علشان الذاكرة الانفعالية اللي بتطلع في الشخصية، أنا شفت ناس كتير مينفعش أبقى متكبر عليهم، ما ممكن أرمي إفيه ويزعلوا.
محمد ثروت يتحدث عن تعاونه مع تامر حسني في فيلم ريستارت
كما تحدث الفنان محمد ثروت، عن تعاونه مع الفنان تامر حسني في فيلم ريستارت، قائلًا: ريستارت أول تجربة تجمعني بـ تامر حسني، كنت مترشح لعدد من أفلامه قبل كده ولكن ربنا مأردش، ولما جالي ترشيح ريستارت اتبسطت جدًا خاصة أني بقدم شخصية أخوه.
وأردف: الموضوع حلو ومثار في الفترة الحالية وواقعي، الفيلم بالنسبة ليا تجربة جميلة جدًا ورصدة الوقت اللي إحنا فيه، والسوشيال ميديا لو استخدمناها صح هتساعدنا وتخلي حياتنا جميلة، ولو استخدمناها غلط هتسود عيشتنا وتحبسنا، أنا بحب تامر حسني على المستوى الشخصي جدًا ومجتهد وهو من مدرسة الارتجال.
محمد ثروت: اتبسطت بـ ردود الأفعال على فيلم روكي الغلابة
أما عن فيلم روكي الغلابة بطولة الفنانة دنيا سمير غانم، واللهجة المصرية رفقة الجمهور العربي، فعلق محمد ثروت: اتسبطت بـ ردود الأفعال على فيلم روكي الغلابة خاصة أنه فيلم جمهور عام، والحمد لله إن اللهجة المصرية العالم العربي كله متربي عليها وأي حد من أي دولة عربية عايز يتكلم مع حد من دولة عربية تانية بيتكلم باللهجة المصرية، وهما عارفين الطبيعة والثقافة والهزار المصري عامل إزاي، ولازم في أي بيت عربي تلاقي واحد نازل مصر حتى أو اتفرج على أعمال مصرية.
