سمعنا صوت عربية بتخبط في العربية النقل.. اعترافات المتهم الأول في حادث مطاردة الواحات | خاص
كشفت التحقيقات في قضية مطاردة طريق الواحات تفاصيل الحادث، واللحظات الأخيرة قبل إصابة المجني عليهما، وتضمنت اعترافات المتهم الأول الذي أدلى بتفاصيل علاقته بالفتيات وسبب تواجده بمكان الواقعة.
اعترافات المتهم الأول في حادث مطاردة الواحات
وحصل القاهرة 24 على نص التحقيقات في قضية مطاردة الواحات والتي حوت أوراقها اعترافات المتهم الأول حيث وجهت له جهات التحقيق، ويدعى عبد الرحمن.ج، الطالب بكلية اقتصاد وعلوم سیاسیة، والبالغ من العمر 18 سنة، تهما بالاشتراك مع آخرين معلومين بالتعرض للمجني عليهما رنا إبراهيم ونزال يوسف، وكان ذلك بالطريق العام، وذلك حال ملاحقة وتتبع المجني عليهما، والاشتراك مع آخرين معلومين بالتسبب خطأ في إصابة المجني عليهما مستخدمين السيارات المضبوطة والتسبب في الاصطدام بسيارة نقل ما أحدث بهما الإصابات المثبتة بالتقارير الطبية المرفقة بالأوراق وترتب على ذلك إصابة 4 أشخاص.
وجاءت أقواله كالتالي:
اللي حصل إن أنا كنت نازل مع مازن وكنا متفقين نروح يوم الأربع مشوار، وروحنا الصبح على بنزينة شيل أوت اللى في طريق المحور وقولنا نقعد شوية نشرب قهوة، وبعدها تتحرك ولما دخلنا البنزينة الدنيا كانت زحمة أوي، مكنش فيه مكان تركن فيه، فراح مازن قافل بعربيته على عربية من العربيات إلى هناك، وقال للناس هناك إن لو حد حب يطلع العربية بتاعته هو قاعد جوا، وبعدين قعدنا ومعداش غير دقایق في حد جه من الشباب الى كانت واقفة، وقال إن هو عايز يطلع من الركنة، مازن قال خلاص إحنا نتحرك للبيت وأجیب فلوسي وبعدين نروح المشوار عشان ندفع الفلوس فطلعنا ركبنا العربية وطلعنا على بيت مازن.
وأضاف المتهم الأول في حادث طريق الواحات أمام جهات التحقيق: إحنا في طريق الواحات كان في عربية بي إم، وعربیة جیلي، وعربیة أفيو ماشيين جنبنا، وكانت كل شوية العربية الأفيو عمالة ترمي علينا، وحبينا نطلع منها كان فيه عربية نقل واقفة، ومازن صاحبي عدى منها وسمعنا بعدها صوت عربية بتخبط في العربية النقل، وبعدها مشينا روحنا على البيت وقعدنا شوية، وعلى الساعة 11 بليل فيه واحد کلم قريب مازن وقالوا إن هو معاون مباحث قسم ثالث، وإن هو عايز مازن فأنا روحت معاه عادي، وبعدها طلب العربية بتاعت مازن، فرحنا جبناها وروحنا على القسم، وهناك لاقيتهم بيسألوا مازن وبيقولوا مين كان معاك.. قالهم عبد الرحمن، راحوا خادوني، وخلوني في القسم وجيت انهاردة وده كل اللي حصل.
وقررت جهات التحقيق بـ أكتوبر إحالة المتهمين في واقعة مطاردة طريق الواحات للمحاكمة؛ ذلك لاتهامهم بإصابة الفتيات نتيجة مطاردتهم للضحايا وتعمدهم مضايقتهن.
