كانوا بيزنقوا عليهم ويهدوا السرعة قدام عربيتهم.. أقوال مصور واقعة مطاردة طريق الواحات | خاص
كشفت التحقيقات في قضية مطاردة طريق الواحات تفاصيل الحادث، واللحظات الأخيرة قبل إصابة المجني عليهن.
أقوال مصور حادث مطاردة طريق الواحات
وحصل القاهرة 24 على نص التحقيقات في قضية مطاردة طريق الواحات والتي حوت أوراقها أقوال مصور الواقعة، حيث جاءت أقواله كالتالي:
س: ما صلتك بالواقعة محل التحقيق؟
ج: أنا شاهد الواقعة وأنا اللي كنت بصور الفيديو.
س وما هي إذًا تفصيلات شهادتك؟
ج. اللي حصل إن أنا كنت قاعد مع ناس أصحابي وسبتهم وبعدها دخلت بنزینة شیل أوت عشان كنت عايز أقعد شویة وساعتها كنت لوحدي وفضلت قاعد شوية كدا لحد ما حصل حاجة قدامي شدتني شوفت، بنات كانوا قاعدين في سيركل كي راحوا ركبوا عربيتهم مرة واحدة وبعدها علطول لاقيت فيه شوية شباب راحوا ركبوا عربياتهم وطلعوا وراهم بسرعة فأنا الفضول شغلني وطلعت وراهم بالعربية أشوف فيه إيه.. المهم طلعوا على طريق المحور وبعدها على طريق الواحات وكان فيه 3 عربيات عمالين طول الطريق بيزقوا على البنات اللي في العربية وفضلوا ماشیين معاهم وشوية قدامهم وشویة وراهم لحد ما البنات خبطوا في عربية نقل كانت على الشمال.
وأضاف الشاهد: ساعتها كنت ركنت ونزلت وروحت لعربية البنات ولاقيتهم متعورين وبعدها وقفت واحدة ست علطول وخدتهم وطلعت على المستشفى وأنا روحت معاهم على المستشفى وفضلت معاهم هناك وبعدها روحت لحد ما لاقيت تليفون جايلي إن أنا مطلوب أقوالي وجيت النهاردة وبس ده كل اللي حصل.
س: متى وأين درات أحداث تلك الواقعة؟
ج: الكلام كان يوم الأربعاء الصبح على الساعة 6 الصبح تقريبا في طريق الواحات والحادثة كانت قدام مساكن عثمان.
س: ومن كان برفقتك آنذاك؟
ج: كنت لوحدي.
س: وما هي كانت مناسبة وجودك بالمكان والزمان سالفي الذكر؟
ج: أنا كنت مع ناس أصحابي قبلها وكنت مروح بس قولت أخش البنزينة أقعد شوية الأول وكان معايا مكالمة تليفون.
س: ما هي صلتك بالمحني عليهن؟
ج معرفش حد فيهم.
س: وما هي صلتك بالمتهمين؟
ج معرفش حد منهم
س: متى تحديدًا دلفت إلى فناء المقهى المسمى ( سيركل كيه ( الكائن بمحطة وقود شيل أوت)؟
ج: أنا وصلت هناك تقريبا على الساعة 5 الصبح وكنت قاعد في العربية منزلتش.
س: وهل أبصرت أنذاك وجود المجني عليهن؟
ج: لا مخدتش بالي أنا مكنتش مركز مع مين قاعد أنا أصلا كنت بتكلم في التليفون.
س: ما الذي أسترعي انتباهك تحديدًا؟
ج: أنا شوفت فجأة فيه بنات راحت ركبت عربيتها وطلعت برا على الطريق وفيه شباب راحوا ركبوا العربيات بتاعتهم وطلعوا ورا البنات.
س: كم عدد الأشخاص الذين أبصرتهم آنذاك؟
ج: أنا شوفت 3 بنات هما إلى ركبوا العربية بتاعتهم بس الشباب مقدرش أحدد كام واحد بس هما كانوا كذا حد.
س: وما الذي دعاك تتبعهم والسير من خلفهم؟
ج: عشان أنا قولت أن أكيد هما هيرازوا في البنات فقولت امشي وراهم.
س: وما هو الطريق الذي سلكه المتهمين والمجني عليهم وقمت بالسير من خلفهم؟
ج: هما طلعوا على الطريق السريع طريق المحور في الاتجاه المؤدي إلى طريق الواحات وبعدها طلعوا على الطريق السريع بتاع طريق الواحات.
س: صف لنا تحديدا ما أبصرته آنذاك؟
ج: أنا شوقت العربيات الثلاثة اللي فيها شباب من أول ما طلعوا من البنزينة كانوا عمالين يستعرضوا قدام البنات وعمالين يزنقوا عليهم ويرموا عليهم العربيات واللي راكبين العربية البي إم كان عمال يعمل درفت بالعربية بتاعته جمب البنات بعدين فضلوا يزنقوا على البنات بالعربيات بتاعتهم ويرخموا عليهم لحد ما البنات خبطوا في عربية نقل كانت راكنة على الشمال.
س: إذا هل لاحق المتهمين المجني عليهن وتتبعهن منذ خروجهن من محطة الوقود وحتى وقوع الحادث؟
ج: أيوة.
س: وما هي المدة الزمنية التي استغرقتها تلك الملاحقة؟
ج: تقريبا من 4 لـ 5 دقايق ودي المدة الزمنية من أول ما البنات طلعت من البنزينة لحد الحادثة ما حصلت.
س: وما هي الأفعال المادية محل إبصارك والتي صدرت من المتهمين آنذاك؟
ج: هو كل عربية كانت عمالة تزنق على عربية البنات ويجوا قدامها ويهدوا السرعة ويمشوا جمبها على نفس السرعة.
