أنقذت حياتي والناس بتستغل أزمتها.. شريف دسوقي يوضح حقيقة تورط بدرية طلبة في بتر قدمه
أوضح الفنان شريف دسوقي حقيقة علاقة بدرية طلبة بـ بتر ساقه، وأوضح حقيقة ما تم تداوله على مواقع التواصل الاجتماعي مؤخرا، مشيرًا إلى أن بدرية طلبة أنقذت حياته عندما أقنعته بعملية البتر.
وقال شريف دسوقي خلال تصريحاته لـ القاهرة 24: كان ليا لقاء من رمضان اللي فات وقولت إن بدرية من ضمن الناس اللي وقفوا جنبي واقنعوني إن أعمل عملية رجلي.
وتابع شريف دسوقي: الناس شالوا كلام منه وانتهزوا الفرصة والأزمة اللي هي بتمر بيها وقالوا بدرية هي السبب في البتر، فـ كان لازم أرد لها حقها.
واختتم شريف دسوقي حديثه قائلا: بدرية أنقذت حياتي لأن أنا كنت رافض البتر، ولو مكنتش عملت العملية حياتي كانت هتنتهي، وهي اللي أقنعتني لصالحي.
وأردف شريف دسوقي: لما لقيت قاطعين الكلام بادرت وعملت ده ورديت لها حقها لأن دي أمانة، وهي مطلبتش مني ده ولا أنا كلمتها من وقت أزمتها.
أزمة بدرية طلبة
من جانبه، يذكر إن بدرية طلبة تمر حاليا بأزمة من نقابة المهن التمثيلية، بسبب تصريحاتها الأخيرة المسيئة، مما جعل أشرف زكي يستدعيها للتحقيق معها في النقابة، وبالفعل انتهى التحقيق مها منذ دقائق قليلة.
بتر ساق شريف دسوقي
وتعرض الفنان شريف دسوقي لعملية بتر ساقه، منذ عدة سنوات، وأوضحت بدرية طلبة حينها تفاصيل تلك العملية، وكتبت بدرية طلبة عبر حسابها بفيسبوك: للناس اللي بتتصل وبتبعت رسايل عشان تطمن على الفنان شريف دسوقي، كان فيه جرح في رجله الشمال وهو مريض سكر، حالته ساءت جدا وبعد الفحوصات والأشعة والتحاليل قرر الدكتور بتر الرجل من تحت الركبة، وهو خرج من أوضة العمليات وحالته مستقرة الحمد لله، ادعوله ربنا يتم شفاه على خير.
