محمد رمضان عن الهجوم عليه: بيغاروا.. وأكبر فنان في تاريخ مصر لما كان في سني مكنش عمل بطولة مطلقة
علق الفنان محمد رمضان على الهجوم المستمر عليه منذ بدايته الفنية، موضحًا أنه لم يقصد استفزاز الجمهور على الإطلاق، لكنه كان يريد مخاطبة فئة أخرى من الجماهير.
وقال محمد رمضان في مؤتمر حفله في لبنان: بيغاروا.. أنا عايز أقول كلام منطقي، أي شيء جديد الناس بتاخد وقت عقبال ما بتستوعبه، وأنا قررت ما مشيش على آثار أقدام حد وقررت أصنع طريق خاص بيا وده طبيعي.
وأضاف: أنا بتهاجم لأني قررت أكون مختلف وأمشي في طرق جديدة خاصة بيا، وأنا بعذر الناس اللي هاجمتني لأن أكيد في سبب كبير من عندي، وأنا والله مقصدش استفزهم، وموضوع العربيات كان دماغي إن أخاطب جمهور تاني وناس تانية، وكنت بلاقي ناس تانية بتزعل، فكنت ببقى محتار أكمل ولا أوقف وأرجع أداوي، ولكني قررت أكمل والجمهور هيفهم.
وواصل محمد رمضان: أنا لسه عندي 37 سنة.. وفي سني كان أكبر نجم في تاريخ مصر مكنش لسه عمل بطولة مطلقة، وكان اسمه الوجه الجديد، الجمهور يستنى عليا ولسه ملامحي هتبان، والله أعلم التاريخ اللي هيذكر.
واختتم محمد رمضان حديثه: دايمًا النجم المصري بعد ما يبقى نجم في بلدي بيبقى حلمه يبقى نجم في المنطقة العربية، وأنا ما بعتبرش ده تقليلًا من النجوم الكبار اللي بتعلم منهم.
