منتج سينمائي: تعرضنا لأكبر عملية نصب تحت ستار عرض استعراضي.. الراجل هرب وساب ممثلين ومخرجين معروفين وشيكات لا تحصل
كشف المنتج السينمائي عمر مجدي تفاصيل تعرضه للنصب من شخص ادعى إقامة أكبر عروض استعراضات في مصر والوطن العربي، لمدة 9 أشهر، تحت اسم ميوزيكال شو.
وكتب عمر مجدي، عبر حسابه بموقع فيس بوك: اسمعوا القصة دي ومش هتصدقوا قد إيه فيه ناس بتلعب بأحلام الناس.. كان فيه شخص بيدعي إنه منتج، اسمه (إيهاب.إ.ح)، الراجل ده دخل علينا وقال هعمل أكبر عروض استعراضات في مصر والوطن العربي مدته 9 شهور بـ اسم ميوزيكال شو، كلام كبير، وحلم أكبر.
وأضاف: عمل إيه؟.. أول حاجة حجز أوتيل ضخم في التجمع، وبقى مقر الإقامة وبروفات لكل حاجة هناك، بعدها أقنع مخرجين كبار بالمشروع، أسماء معروفة في الوسط الفني، واحد ورا التاني بدأ يجيب ممثلين، دانسرز، ملحنين مؤلفين مديرين إنتاج (وأنا كنت واحد منهم).
وأكمل: لكن الحقيقة.. أسابيع ورا أسابيع، بروفات بدون هدف، ولا جنيه نزل لحد، بدأنا نشم ريحة غلط، كل يوم كلام مختلف، كل أسبوع وعود جديدة، لحد ما الناس انفجرت وبدأت تطالب بحقوقها، وهنا الصدمة: مفيش فلوس، مفيش مشروع والراجل هرب، وساب وراءه قضايا ومحاضر بالشيكات لا تُعد ولا تُحصى، الراجل هرب وساب الكل، ممثلين، مخرجين، دانسرز، إنتاج، حتى الفندق نفسه، المأساة مش بس إننا اتنصب علينا، المأساة الحقيقية إن فيه ناس سابت شغلها، حياتها، وقتها، وصدّقت وهم كبير، وفي الآخر ماخدتش ولا مليم.
واختتم: القمة في البجاحة.. النهاردة الراجل ده بيعمل نفس الليلة في الإمارات، ومش بس كده، معاه بعض المخرجين اللي كانوا معانا هنا، واللي كنا فاكرين إنهم اتنصب عليهم زينا، اللي حصل ده مش واقعة عابرة، ده نصب منظم على أكتر من 100 شخص غير الفندق وباقي الجهات اللي ليها حقوق، وأنا بكتب الكلام ده النهارده عشان محدش يقع في نفس المصيدة تاني، وهنا كل اللي كتبته ده مش مجرد كلام وخلاص كل ده معايا ما يثبته.. عقود، شيكات، صور محاضر ومستندات تثبت كل كلمة قلتها.
