موت نفسك الجمهور هيشيلك.. ميدو يوجه رسالة للاعبي الزمالك بعد الفوز على مودرن
أشاد أحمد حسام ميدو نجم الزمالك وعضو لجنة التخطيط السابق، بالفريق الأول لكرة القدم بعد الفوز على مودرن سبورت، في المباراة الماضية التي جمعتهما ضمن منافسات الدوري الممتاز.
ميدو يشيد بلاعبي الزمالك بعد الفوز على مودرن سبورت
وكتب ميدو عبر حسابه الرسمي على إكس: ألف مبروك فوز الزمالك وأحسن حاجة حاصلة في الزمالك السنادي زي ما قلتلكم قبل كدة، إن الفريق مقفول عليه كويس ومعزول تمامًا عن أي مشاكل بتدور حوالين النادي.
وتابع: عايز أحيي فيريرا على تشكيله وتدخلاته في الماتش، وعايز أحيي اللاعيبة اللي كان واضح عليهم الإصرار على المكسب، واللعب بشراسة من أول دقيقة.
واختتم ميدو: لازم كل الماتشات تتلعب كدة، موت نفسك في الملعب جمهور الزمالك هيشيلك فوق دماغه، اوعى حد يحط في مخك إنك أقل من أي فريق بالعكس وبكررها تاني الزمالك السنادي مش أقل من الأهل ولا أقل من بيراميدز، لازم اللاعيبه تبقى فعلا مؤمنه بكدة.
وكان ميدو قد شن هجومًا قويًا على فيريرا ولاعبي الزمالك، بعد التعادل مع المقاولون العرب في الجولة الثانية بالدوري، حيث كتب عبر إكس: أي مدرب يبدأ بدونجا في تشكيل الزمالك تعرف إنه مدرب مبيعرفش يقيم اللاعيبة كويس.
وأضاف: أي مدرب يبدأ بناصر ماهر جناح أيمن بالذات بعد ماتش سيراميكا، تعرف إنه مش عايش معانا، وأحمل ضياع نقطتين مهمين جدًا لمدرب الزمالك وبصراحة كلمة فيريرا مش قادر أنطقها.
وواصل ميدو: خسارة عدم استغلال الانطلاقة الجيدة للفريق أمام سيراميكا، والدوري لسه طويل بس منافسين الزمالك شرسين وما بيضيعوش نقاط بسهولة والموسم ده مش محتاج أخطاء زي الأخطاء اللي حصلت.
واختتم ميدو موجهًا رسالة إلى فيريرا مدرب الزمالك: العب بتشكيل صح، وبلاش فتي.
