الضحكات تحولت لصرخات.. شاهد عيان يروي كواليس رحلة مصيفية تحولت لكارثة بشاطئ أبو تلات في الإسكندرية
حادث مأساوي شهده شاطئ أبو تلات في غرب الإسكندرية صباح اليوم السبت، بعد أن تحولت رحلة قادمة من إحدى الأكاديميات الخاصة بمحافظة سوهاج إلى كابوس، حيث لقي 6 أشخاص مصرعهم وأصيب 24 آخرين في حادث غرق جماعي.
وروى أحد شهود العيان لـ القاهرة 24 تفاصيل الحادث قائلا: أنا كنت موجود النهاردة في أبو تلات على البحر، ولقينا رحلة جاية عددهم 146 شخصا أغلبهم بنات صغيرين أعمارهم من 14 لحد 20 سنة، ومعاهم مشرفين، ومن أول لحظة الغطاسين على الشاطئ قالوا ممنوع النزول لأن الموج عالي.
وأضاف شاهد العيان: كانوا بيضحكوا ويلعبوا ويتصوروا.. في بنت قررت تنزل البحر فجأة، بعدها نزلت واحدة تانية معاها، وفي لحظة كل حاجة اتغيرت، الموج ارتفع فجأة البنتين الموج سحبهم وبدئوا يغرقوا، باقي الناس اللي على الشط جريت على المياه تحاول تنقذهم، وفي 9 غطاسين من الشاطئ نزلوا بسرعة يلحقوهم.
واستكمل شاهد العيان: المشهد فجأة بقى كارثي، ناس مش بتعرف تعوم نزلت وخاطرت عشان ينقذوا أصحابهم، وبدل ما 2 بيغرقوا بقوا عشرات، الصراخ بقى سيد الموقف، المنقذين كل ما ينقذوا حد نلاقي ناس تانية الموج سحبها، مش ظاهر من البنات غير أياديهن واستغاثتهن.
وأضاف شاهد العيان: بعد دقائق وصلت سيارات الإسعاف، وبدء المسعفين في إسعاف بعض الحالات على الشط، فيما خرج 6 أشخاص ولفظوا أنفاسهم الأخيرة، فتحول فجأة الشاطئ لحالة بكاء هيستيري.
