الطيار مات وهو جايبلي أوردر.. عميل يشارك واقعة صادمة عن شركة توصيل
استنكر أحد مستخدمي مواقع التواصل الاجتماعي في منشور شاركه عبر حسابه على فيسبوك، تعامل شركة توصيل مع موظفيها من الطيارين بعد وفاة عامل.
عميل يشارك واقعة مؤسفة
وشارك شاب منشورا عبر حسابه على فيسبوك كتب فيه: جايلي أوردر من شركة توصيل فالأوردر اتأخر فلقيت مكالمة من خدمة العملاء بيقولولي بنعتذر الأوردر اتأخر بس الطيار وهو جايلك مات،
فانا تنحت وبقوله يعني إيه مات، قالي حضرتك لو مش مصدقني أنا هبعتلك فيديو، وفيه طيار تاني جايبلك الأوردر وهييجي على طول.
وتابع: أنا عمال اسأل يعني إيه مات؟ مات ازاي، قالي مات في حادثة، أنا كل اللي مستغربة إن بتاع خدمة العملاء شايف إنه يطمني إن الأوردر هيوصل وده أهم من إنه فيه شخص مات!!!.
وأضاف: يعني تمام هو بيحاول يعمل شغله وكل حاجة بس هل الطبيعي إن أنا كعميل لما أعرف إن الطيار مات، وهو جايبلي أوردر اتعصب واتجنن إن الأوردر اتأخر وطظ في الشخص اللي مات ده؟، هل قيمة الأوردر أكبر من حياة الشخص اللي مات؟ وهو الناس حصلها إيه؟ يعني مش معترض على إنه بيحاول يطمني على الأوردر بتاعي، بس في الأخر في واحد مات وهو بيعمل شغله، وأنا لو عندي ذرة إنسانية أكيد هتفهم اللي حصل ده، أنا مخضوض جدا إننا بنفكر كدة، وحاجة على جنب لشركة Talabat.
واستطرد: يا ريت تنبهوا على الطيارين يلتزموا بالطرق والاتجاهات لأن حياتهم أهم من الأوردر يوصل بسرعة، لأن أنا يوميا بشوف طيارين ماشيين عكس وقاطعين الطريق علشان التقييم وعلشان السرعة، وفي الآخر أهو ممكن يروحوا في ثانية!!!، الله يرحمه ويرحم كل واحد بيحاول يجري على أكل عيشه ويهمل في نفسه وفي عيلته.
