بلاش منظرة بتاريخ النادي.. رسائل قوية من أيمن يونس للاعبين المعتزلين
وجه أيمن يونس نجم الزمالك السابق، رسائل قوية بعد تصريحات لاعبي الكرة المعتزلين بشأن أسرار غرف الملابس، وذلك تزامنًا مع تصريحات شيكابالا قائد القلعة البيضاء الأخيرة.
رسائل قوية من أيمن يونس للاعبين المعتزلين
وقال أيمن يونس في تصريحات إذاعية: في لاعيبن بيتكلموا كتير بعد الاعتزال، وإحنا شوفنا أمثلة كتيرة، والمعتزلين اللي بيتكلموا في البرامج عايزين يطلعوا ترند، ويعملوا لنفسهم حاجة مختلفة.
وتابع: من حقكم كل واحد يتكلم ويطلغ اللي عنده وخبايا وأسرار أوضة اللبس وأسرار ناديه، وكل واحد يتكلم زي ماهو عايز، لكن في أسرار بتقال وأسرار لأ، لإن أنت مينفعش تقلل من قيمة ناديك.
وواصل نجم الزمالك السابق: أنا عندي أسرار كتير في نادي الزمالك واللاعبين واتحاد الكرة، لكن دي حرمة المكان اللي أنت فيه، ويجب عليك احترام المكان اللي أنت فيه، ولو الأخطاء بالذات سلبية مش من حقك تعلنها بالشكل دا وتقلل من قيمة المكان والتاريخ اللي أنت جزء منه ومن قيمة ناديك.
واختتم أيمن يونس:حاجات مهمة أوي لكل نجومنا اللي اعتزلوا وبيطلعوا على الشاشات، خلوا بالكم على تاريخ ناديكم واسم زمايلكم دا جزء من احترامكم، ولو في أخطاء مش بقول تخبيها لكن متزايدش بيها، ومتكسبش منظرة على حساب التاريخ النادي أو زمايلك أو على أي حد مهما كانت الحاجات مهمة أوي.
وكان شيكابالا أثار جدلًا واسعًا بعد تصريحاته الأخيرة، والتي كشف خلالها كواليس غرفة ملابس الزمالك، حيث قال: مباراة لـ نهائي إفريقيا كنا رايحين بـ 14 لاعب فقط وقتها.
وتابع: كان في 2 لاعيبة دخلت عليهم الأوضة لاقيتهم بيشربوا شيشة وفي الأخر خسرنا البطولة.
واختتم: كنت عاوز أبقى مدرب الزمالك، لكن الناس جوه النادي مش هتسيبك تشتغل وهتحاربك، وكان فيه 3 أشخاص بيحاولوا يهدوا فيا ويشوّهوا صورتي قدام الجمهور، لكني كنت واثق إن جمهور الزمالك بيحبني، ومكنتش مصدق الإشاعات، ومع الوقت ربنا أظهر الحق.
