حسام حبيب: شيرين هترجع لجمهورها قريبًا.. وبقالي 4 سنين بيطلع عليا شائعات
كشف حسام حبيب عن تعرض شيرين عبد الوهاب لأزمة صحية خلال الأيام الماضية، كما كشف عن كواليس شائعات القبض عليه.
حسام حبيب: شيرين هترجع لجمهورها قريب.. وبقالي 4 سنين بيطلع عليا شائعات
وقال حسام حبيب من خلال لايف: بقالي 4 سنين بيطلع عليا شائعات وأنا دلوقتي في بيتي بالتجمع والشخص اللي بيسرب تحقيقات نيابة وبيحاول يشوه صورتي ده مريض ومعرفش ليه بيعمل كده.
وأضاف: شيرين عبد الوهاب تعبانة جدًا ولكن هترجع لجمهورها قريبًا وخايف من ضغط الناس عليا ولكن فيه شخص هو اللي بيحاول دائمًا يشوه صورتي ولما كنت بتخانق مع شيرين كان بسبب نفس الشخص.
واستكمل قائلًا: شيرين بقالها كتير بتتعرض للظلم ونفسي ترجع تاني مرة أخرى وأقرب الناس لشيرين بتحاول توقعها ومعرفش ليه بيعملوا كده فضلًا على وجود لجان إلكترونية كتير بتحاول تهد فيها.
ومن ناحية أخرى أعلن حسام حبيب منذ أيام عن عزمه اتخاذ الإجراءات القانونية ضد المحامي ياسر قنطوش، الوكيل القانوني السابق للفنانة شيرين عبد الوهاب، على خلفية ما وصفه بتصريحات مغلوطة وكاذبة تمس سمعته الشخصية، وتروّج لمزاعم بعيدة تمامًا عن الحقيقة.
كما أكد في بيان رسمي صادر عنه، أنه قرر اتخاذ الإجراءات القانونية اللازمة لحماية اسمه ومصالحه الشخصية، مشددًا على أنه لن يصمت أمام أي محاولة لتشويه صورته أو الإساءة إليه أمام الرأي العام.
