بعد اعتداء مريض عليه بمشرط.. طبيب الامتياز بمستشفى سيد جلال: 5 سنين تعب ضاعوا في لحظة
كشف الدكتور محمد بسيوني، طبيب الامتياز الذي تعرض للاعتداء بمشرط في وجهه داخل مستشفى سيد جلال، عن تفاصيل الواقعة، مؤكدًا أنه لم يكن طرفًا في أي مشادة مع المريض قبل الهجوم.
طبيب الامتياز بمستشفى سيد جلال: 5 سنين تعب ضاعوا في لحظة
وكتب بسيوني عبر صفحته الرسمية على موقع التواصل الاجتماعي فيس بوك: الحمد لله على كل حال، ونسأل الله أن يفرغ علينا صبرًا، أنا مكنتش ناوي أتكلم، لكن شوفت تعليقات بتلومني وبتقول أكيد استفزيته، وده محصلش خالص.
وأضاف طبيب الامتياز: أنا كنت في المستشفى والحالة دي مش حالتي أصلًا ومليش أي علاقة بيه، الراجل جه المستشفى وهو تقريبًا كان متعارك برا، وفجأة بدأ يشتم في المستشفى والدكاترة. وأنا واقف في جنب مع زميلي لقيته بيشتم ويسب بالأب والأم.
وواصل: طلعت ناديت الأمن وبلغتهم إن فيه حد بيشتمنا، وفجأة لقيته جاي من ورايا بيقولي هخزق عنيك، واعتدى عليا وعورني في وشي بمشرط، خدوني بسرعة على العمليات ومكنتش مستوعب أي حاجة.
وأكمل: بعد 5 سنين تعب ومذاكرة و200 امتحان، أطلع امتيازي ألاقي حد يعورني في وشي!، مش عارف مستقبلي رايح فين ونفسيتي تعبانة جدًا. كل اللي بطلبه منكم الدعاء، وربنا يصبر أمي وأبويا اللي مش قادرين يتحملوا اللي حصل.
وأشار إلى سرعة تدخل فريق الأطباء بالمستشفى لإنقاذه، مؤكدًا أنهم لم يتأخروا لحظة، كما حرص مدير المستشفى على الاطمئنان عليه فور الحادث.
