أسرة شاب بالإسكندرية تستغيث بسبب إصابته بمرض مناعي: مش عارفين نشخص حالته من سنتين
استغاثت أسرة شاب من محافظة الإسكندرية، يدعى زياد كمال سعيد، يبلغ من العمر 22 سنة، بسبب إصابته بمرض مناعي لم يتمكن الأطباء حتى الآن من تشخيصه.
وقال بيجاد سعيد، شقيق الشاب زياد سعيد كمال، في تصريحات خاصة لـ القاهرة 24: محتاج مساعدة الجميع عشان ننقذ زياد، أخويا عنده 22 سنة، بيعاني من التهاب مناعي في جذع المخ، وبقالنا سنتين بنحاول مع أكتر من دكتور ومستشفى إننا نشخص المرض المناعي لزياد، لكن مفيش حد عارف يشخص الحالة، وكل أشعة وتحاليل أي دكتور طلبها عملناها.
أسرة شاب بالإسكندرية تستغيث بسبب إصابته بمرض مناعي
وأضاف بيجاد سعيد، شقيق الشاب زياد سعيد كمال الذي يعاني من مرض خطير: حصلنا استنزاف مادي ومعنوي ونفسي، وبدون أي فايدة، ومش عارفين هنوصل لإيه وبرضو مفيش تشخيص صريح للحالة، وبقالنا سنتين بنلف على كل الدكاترة، لغاية لما تعبنا، وحالة زياد دلوقتي بتسوء وبقى في خطر، ومحجوز حاليًا في مستشفى بالإسكندرية، ومش شايفين أي تحسن وحاطينه في عناية الطوارئ، وكل يوم بشوف حالته بتسوء أكتر.. أخويا بيضيع مني.
وأكمل: في بداية تعب زياد بدأت تظهر عليه بعض الأعراض، ومنها الدوخة والزغللة، وبيواجه صعوبة وهو بياكل، وحاليًا لسانه بقى تقيل جدًا، والجفون بدأت تقفل علي عينه، مع عدم اتزان خلال المشي، ومن سنتين لحد انهاردة مش عارفين نحدد هو عنده أي ولا تشخيص مرضه إيه، والفترة دي ظهرت عليه مضاعفات صحية، منها التهاب رئوي شديد.
