جيهان الشماشرجي: مريت بتجربة قاسية انعزلت وهجيت بسببها.. ونظرتي للراجل اتغيرت
كشفت الفنانة جيهان الشماشرجي، تفاصيل تجربة عاطفية قاسية مرت بها قبل دخولها الوسط الفني، جعلتها تنعزل وكانت سببًا في تغيير نظرتها عن الرجال، ودخولها الوسط الفني بالصدفة.
وقالت جيهان الشماشرجي، في لقائها بـ برنامج صاحبة السعادة للفنانة إسعاد يونس: مريت بتجربة قاسية ومن بعدها كنت عايزة أنعزل، وسافرت وقعدت لوحدي كتير وده عرفني حاجات عن نفسي بعد تجربة قاسية كنت عايزة استطعم الأكل وأتنفس وأشم هواء، وقررت ساعتها أن باب التمثيل لما اتفتحلي قلت هجرب أي حاجة وجربت وبقيت ممثلة بالصدفة.
وتابعت جيهان الشماشرجي قائلة: لما بفكر لما مشيت وهجيت وقعدت لوحدي كتير، افتكرت أنا مين، كنت ببص في المراية ومش عارفة ملامحي وشكلي متغير، ومعنديش ثقة في نفسي، كان عندي إحساس وحش أوي تجاه نفسي، مكنتش بتكلم مع حد وأبص في عينه علشان ميشوفش قد إيه أنا قبيحة، تجربة علمتني وبحمد ربنا عليها عالجت نفسي واتعالجت من التجربة دي بالراحة وقعدت أتأمل وأفكر وإيه مسؤوليتي فيها، على قد ما كانت تجربة مؤلمة أوي على قد ما أنا اتعلمت.
وأضافت جيهان الشماشرجي: نظرتي للراجل اتغيرت من بعد التجربة دي، وبقيت عارفة إيه اللي أنا مش عايزاه خالص، وبتبقى نوعية معينة وباينة، وعرفت أنا عايزة إيه وعمره ما بيجي.
