كابتن منتخب مصر بعد التتويج بكأس العالم للأطفال بلا مأوى: نفسي الناس تهتم بينا
نجح منتخب مصر للأطفال بلا مأوى في كتابة التاريخ، بعد تتويجه ببطولة كأس العالم على حساب البرتغال بنتيجة 4 – 3، وسط مشاركة 50 فريقًا من مختلف دول العالم.
تعليق كابتن منتخب مصر بعد التتويج بكأس العالم للأطفال بلا مأوى
وفي تصريحات خاصة لـ القاهرة 24، عبر مصطفى شيكا كابتن منتخب مصر، عن فرحته الغامرة بالإنجاز، كاشفًا عن معاناته وظروفه الصعبة قبل الوصول إلى هذه اللحظة.
وقال مصطفى شيكا: أنا عندي 34 سنة وساكن في ميت عقبة، والدتي توفيت وأنا صغير، ووالدي سابني وقعد في طنطا، وكنت بشتغل وأصرف على نفسي لوحدي، ورغم كل ده فضلت متمسك بحلمي في الكورة، وأهل المنطقة كانوا بيقولوا عليا لاعب حريف، واللقب شيكا جه من لعبي للكرة، لأني كمان من زمان بعشق رونالدينيو وشيكابالا.
وعن تفاصيل البطولة، أوضح قائد المنتخب أن كرة القدم بنظام 4 ضد 4 تحتاج إلى مجهود بدني ونَفَس قوي، مضيفًا: بقينا 9 شهور بنتدرب في الهرم 3 أيام في الأسبوع من 9 لـ10 بليل، وأحيانًا كنت بروح من الساعة 2 عشان ألم زمايلي ونعرف بعض أكتر.
وتابع: البطولة كانت صعبة جدًا وأجواؤها جديدة علينا، لكن لما كنا نسمع النشيد الوطني كنا بندمع وبنقول لازم نكسب ونشرف مصر.
وأشار شيكا إلى أن المشاركة في البطولة أثرت بشكل كبير في شخصيته، خاصة مع احتكاكه بلاعبين من ثقافات مختلفة، مؤكدًا أن التجربة في النرويج كانت مميزة على كل المستويات.
وعن حلمه المستقبلي بعد الفوز قال: نفسي الناس تهتم بأي بني آدم تعب وحقق حاجة لبلده، وتقدره على اللي عمله.. مش طالب أكتر من كده.
