رعب بعد منتصف الليل.. طبيب بيطري يتهم سيدة بتقطيع الحيوانات واستخدامها في السحر الأسود
زعم طبيب بيطري مصري، عبر حسابه بفيسبوك، استخدام أشخاص مقيمين خارج مصر، الحيوانات من القطط والكلاب، لوضع تعاويذ بداخلها وتصويرها، لبيعها عبر دارك ويب.
طبيب يزعم استخدام هياكل الحيوانات في السحر الأسود
وقال الطبيب عبر حسابه: القطط والسحر والدارك ويب.. الكلام اللي هكتبه دا لو أنا مش اللي عيشته بنفسي مستحيل كنت هصدق أو هقتنع.
وتابع: من أسبوعين تقريبا الساعه 12:30 منتصف الليل جالي رسالة على الواتس آب يا دكتور في حالة طوارئ ضروري ممكن تفتحوا…أنا اتخضيت ونزلت بالفعل على المركز وسألت فيه ايه؟.. بصيت كده وركزت لقيت بوكسات فيها قطط كتير وعرفت إنهم 11 قطة.
وأضاف: أول حاجة جت في دماغي إنه يا إما مرض فيروسي يا إما حالة تسمم هي اللي ممكن تبقي جماعية كده، لكن الصدمة بقي إني بصيت للبنات اللي جايبينهم، لقيتهم يبدوا عليهم القلق والتوتر وواحدة منهم واقفه على رجليها بالعافية.
وتابع: طيب ايه يا جماعه اللي حصل؟؟ ردت واحده منهم.. يا دكتور القطط ديه احنا جايبينهم من بيت من عند واحدة بالعافيه اخدناهم والقطط متبهدلة جامد زي ما أنت شايف... وبالفعل القطط كانت بين الحياة والموت!!
وأردف: الصدمه التانية يا دكتور دي مش بس القطط.. دا البيت كله قطط متقطعة ومدفونة وهياكل قطط، وغالبا حيوانات تانية... وهنا أنا وقفت في ذهول تام، ايه اللي بيحصل وليه الست دي بتعمل فيهم كده.
وتابع: بدأت بالفعل أحاول أعالج في القطط وننقذ ما يمكن إنقاذه، والحالات بين إصابات فيروسية وبكتيرية وجروح ومشاكل في الهيكل، ومشاكل جلدية، وبعدين قدموا محضر في الشرطة وطلع إذن بدخول البيت.
وأضاف: في يوم دخول البيت لجنة الوزارة اتصلت لو سمحت عايزين الطبيب اللي استلم الحالات ييجي البيت ويشوف الهياكل دي تقريبا ميته من فتره قد ايه، وبالفعل رحت البيت مكان مرعب جدا وكمية هياكل لقطط ودجاج وكلاب وهياكل مدفونة متقطعة.. ودخلنا البيت مع وجود آثار دم وحضرت التحقيق الميداني مع أصحاب البيت لأنهم كانوا بيحاولوا يقولوا كلام طبي غلط لتبرير الموقف.
واختتم: التحقيقات شغالة، ولكن ما تم إثباته حتى الآن إن الست صاحبة البيت كانت تستخدم الحيوانات في السحر ووضع التعويذات داخل أعضاء الحيوانات، ودفنها وتقطيع القطط وتصوريها علشان الدارك ويب، وإنها بتبيع عليه الفيديوهات دي بفلوس، والحمد لله الحالات اللي أخدناها تم علاجها بدون نفوق أي حالة منها.
