عمر متولي: عادل إمام كان زملكاوي بالعند.. ووالدي وصلاح السعدني الأكثر تشددًا في الكرة
كشف الفنان عمر متولي عن الانتماء الكروي لخاله الفنان الكبير عادل إمام، ووالده الفنان الراحل مصطفى متولي، كما تحدث عن العلاقة القوية التي جمعته بالفنان صلاح السعدني.
وقال عمر متولي في تصريحات إذاعية: والدي كان كروي جدًا، كنت أصحى ألاقيه قاعد قدام المباراة والموبايل جنبه، وكل ما يحصل موقف في الماتش يتصل بصلاح السعدني من غير حتى ما يسلم عليه، يقوله: شُفت اللي عمله اللاعب ده؟ ويقفل الخط.. ويقعدوا طول الماتش على الحال ده.
وأضاف: عادل إمام كان في البداية زملكاوي بالعند، وهو أصلًا ملوش في الكورة، لكن مع الوقت ابتدى يتابع ولما لقي ابنه رامي من وهو طفل بيقول (أهلي أهلي، تابع شوية وحب الأهلي جدًا، وبعدها بطل يحدد هو أهلاوي ولا زملكاوي عشان محدش يزعل.
سبب ترك عمر متولي لمسرح مصر
وعن قراره بالانسحاب من مسرح مصر مع الفنان أشرف عبد الباقي، أوضح عمر متولي في تصريحات سابقة: قعدت في مسرح مصر 5 سنين، وأشرف عبد الباقي مفيش أطيب منه، كنا ممكن نتخانق في البروفات ونرجع نضحك وننسى الخناقة.. لكن التجربة كانت مرهقة جدًا، كنا بنقعد نشتغل 16 ساعة في اليوم.
وتابع: إحنا عملنا 25 مسرحية في السنة على مدار 5 سنين، وده رقم ضخم جدًا وبيستهلك وقت ومجهود وطاقة، عمالقة المسرح زي فؤاد المهندس وسمير غانم كانوا بيشتغلوا رواية واحدة سنين وحافظينها، إنما إحنا كل 3 أيام بنعرض رواية جديدة، وده كان جنون وضغط عصبي، في الآخر قررت أسيب مسرح مصر لأني كنت داخل على فيلم من أحلام حياتي، وكمان كنت محتاج أرتاح، وبعدها بالفعل عدد المسرحيات قل.
