اعترافات المتهمة بتشويه وجه عروس مصر القديمة: باركتلها على الفرح فشتمتني وروحت أعاتبها في بيتهم اتخانقوا معايا |خاص
كشفت التحقيقات في واقعة اعتداء سيدة - مطلقة - على عروس طليقها وتدعى منصورة، وتشويه وجهها باستخدام شفرة حادة، قبل أيام قليلة من موعد زفافها بمنطقة مصر القديمة، تفاصيل الواقعة.
اعترافات المتهمة بتشويه وجه عروس مصر القديمة
وحصل القاهرة 24 على التحقيقات في قضية تشويه وجه عروس مصر القديمة، وبمثول المتهمة مريم. ا. ع. ا أمام جهات التحقيقات المختصة، وبسؤالها ما قولها فيما هو منسوب إليها من إنها متهمة بالتعدي بالضرب علي المجني عليها منصورة. ي مستخدمة في ذلك سلاحا أبيض ومحدثة إصابتها المبينة بالأوراق والتي من شأنها إعجازها عن أشغالها الشخصية مدة تزيد عن 20 يوما وعلى النحو المبين بالتحقيقات؟، أنكرت المتهمة تلك الاتهامات قائلة: محصلش.
كما جاءت تفاصيل التحقيقات مع المتهمة بتشويه عروس مصر القديمة كالآتي:
س: ما الذي حدث إذًا وماهي ظروف ضبطك وعرضك؟
ج: اللي حصل إن منصورة وعيلتها جيراننا في عزبة خير الله وكنت بروحلهم أفراح وهما بيحضروا أفراحنا وفي شهر فبراير السنة دي أنا اتطلقت ومنصورة عندي على فيس بوك نزلت من 10 أيام تقريبا منشور بتقول إن فرحها على طليقي يوم 24 سبتمبر، رحت أنا قلتلها ألف مبروك ابقوا اعزموني راحت شتمتني وقالتلي أنتِ مش كويسة وعشان كدة طلقك.
وأضافت المتهمة خلال أقوالها أمام جهات التحقيقات المختصة: وأنا اتضايقت رحت اتصلت بمصطفى عشان هو صاحب طليقي وأنا عارفة إنه على علاقة ببنت عم منصورة اللي اسمها ندى، وقلتله اللي حصل وإني عاوزة أقعد مع أمها عشان غلطت فيا، وهو قالي خلاص تعالي وهنروح ويأدبوها قدامك.
وأضافت: لقيت بعدها ندى بعتتلي رسايل على تليفوني وبتقولي ابعدي عن مصطفى وإنهم جولي البيت ودوروا عليا وملقونيش وأنا كنت رايحالهم مع مصطفى ولما وصلت كانوا هما تحت البيت ومسكوا في خناقي وشدوا فيا ومصطفى وقف يحوش في النص، وقعدوا يشدوا فيه راح مصطفى حاول يبعدهم والناس في الشارع مشتني وركبتني توك توك، وأنا بركب التوك توك سمعت صويت والناس بتقول دي اتعورت في وشها ومصطفى ركب معايا وكلموه قالوله متدخلش نفسك في الموضوع عشان منصورة اتعورت، وإحنا هنعمل محضر بمريم.
وأردفت: فأنا خفت رحت قعدت عند خالتي اليومين دول ولقيت طليقي بيكلمني بعدها بيومين، وقالي إن الموضوع مش كدة وإنه مش هيتجوزها ولا حاجة وإنه عاوز يردني وأنا وافقت بس بعد ما تتحل المشكلة، ولقيت بعد ما قفل معايا إن منصورة وأهلها نزلوا منشورات في الجروبات وبيقولوا إن مفيش حاجة وإنهم مش عاوزين مني حاجة خلاص، ورحت بيت طليقي بعدها بيومين وقعدت عنده وفجأة لما هما عرفوا لقيناهم عملوا موضوع الإنترنت، واتهموني ظلم وطلبوا 150 ألف جنيه عشان يتنازلوا عن المحضر.
واختتمت: والنهاردة حوالي الساعة 5 الفجر اتقبض عليا أنا وطليقي، وقعدونا لحد الصبح وسألوني عن الحكاية وحكيتلهم وفضلوا مقعديني فوق وهي جات القسم برضو وراحوا جابوني النيابة.
