قتلته وروحت الجامع.. اعترافات المتهم بقتل سائق توك توك بطلق ناري في الرأس لسرقته بإمبابة
أمرت جهات التحقيق بإحالة شقيقين إلى محكمة الجنايات المختصة، وذلك لقتلهما سائق توك توك بعد أن استدرجاه لتوصيلهما إلى أحد الأماكن لسرقته، وأطلقا النيران على رأسه بامبابة.
اعترافات المتهم بقتل سائق توك توك بطلق ناري في الرأس لسرقته بامبابة
وحصل القاهرة 24 على نص التحقيقات في القضية، وبسؤال أحد المتهمين عن تفصيلات أقواله بشأن الواقعة؟ أجاب: اللي حصل إن أنا عندي فيروس الإيدز وفيروس بي الكبدي وكنت محبوس قبل كدة في قضايا سرقة بالإكراه من ساعة ما خرجت في شهر 4 اللي فات وأنا كنت ناوي أتوب وكنت بدور على شغل ومافيش حد عاوز يشغلني بسبب إني كنت محبوس وبسبب الأمراض اللي عندي، وده اللي خلاني أضعف وشيطاني يغلبني واضطر إني أسرق علشان مفيش شغل ليا نهائي، وفعلًا قررت إني أسرق تاني.
وأكمل: من حوالي أسبوعين تقريبًا طلبت من حسام أخويا يجي معايا عشان نثبت أي سواق توكتوك في المكنة اللي معاه وفعلًا طلعنا علي شارع أحمد عرابي علي الكورنيش عندنا في شبرا الخيمة وركبنا توك توك من هناك وطلبت منه انه يودينا معهد ناصر في شارع شبرا ولما دخل بينا شارع ضلمة رفعت في وشه الفرد وخليته ينزل من التوك توك وأخدت التوك توك بيعته عندنا في شبرا الخيمة بـ 2000 جنيه تقريبًا وده اللي خلاني احس ان الموضوع سهل وأي حد هيترفع في وشه السلاح هيخاف ويسلم ويسبب التوك توك وينزل.
وأضاف المتهم في اعترافاته أمام جهات التحقيق: يوم الخميس 20 فبراير 2025 طلبت من حسام إنه يجي معايا تاني نسرق توك توك كمان بس قولت نروح نعمل كده في مكان تاني غير شبرا عشان محدش يكون عارفنا فأخدت حسام وروحنا على إمبابة جمب محكمة السودان ولما كنا هناك لاقيت توكتوك معدي قدامنا روحت شاورتله ووقف وانا قلت لسواق التوكتوك، تودينا معهد ناصر قالي اركبوا وفعلا ركبنا معاه ومشي بينا وأول ما اتحركنا كان معايا مطوة إدتها لحسام اخويا واحنا ماشيين كنا بنتكلم مع السواق في الطريق وعزمت عليه بسيجارة وإتكلمنا في غلاء المعيشة وان العيشة بقت صعبة ولما وصلنا على كورنيش امبابة كانت الدنيا هادية خالص ومافيش حد في الشارع خالص والعربيات الكانت معدية كانت قليلة فقلت للسواق يقف بحجة إني أعمل حمام وهو فعلا وقف على جنب الطريق.
وأكمل المتهم في اعترافاته: وانا أول ما نزلت من التوكتوك طلعت الفرد وطلبت منه يسيب التوكتوك وكنت ماسك الفرد من الخشبة بتاعته وأيدي كانت بعيدة عن الزناد وفجأة لقيت السواق مسك الماسورة بتاعت الفرد بايده الشمال وبيحاول يشد الفرد مني وكان التوكتوك وقتها يبتحرك روحت أنا ماسك الجادون بتاع التوكتوك بأيدي الثانية، وحسام راح مطلع المطواه الأنا كنت مديهاله وحطها في جمب السواق بس من غير ما يعوره عشان خاطر يسيب الفرد اللي في ايدي بس فجأة مع الشد والجذب لقيت طلقة خرجت من غير ما قصد من الفرد وجت في دماغ السواق ولقيت الدم بتاع السواق غرق التوكتوك وطرطش عليا انا وحسام وأنا وقتها اتصدمت ومش عارف ازاي ده حصل ومبقتش عارف افكر من الخضة وحسام اخويا كان عمال يصوت ورا لحد ما التوكتوك خبط خبطة صغيرة في الرصيف ووقف.
وأردف: الراجل السواق كان خلاص نص جسمه بقا برا التوك توك وانا زقيته زقة صغيرة فالمر وقع علي الرصيف برا التوك توك وقتها الفرد الخرطوش وقع مني ومن الخوف مقدرتش انزل اجيبه وطلعت بالتوكتوك علي طول وروحت به علي شبرا الخيمه وأول ما وصلنا شبرا حسام اخويا سابني ومشي وانا رميت التوكتوك على الطريق ناحية ترعة الشبوري في شبرا وروحت علي البيت علي طول وطول ما انا ماشي كانت صورة الراجل في دماغي وخايف ومش عارف افكر وأول ما وصلت البيت طلعت لوالدي ووالدتي وقلتلهم انا عملت مصيبه كبيرة وقتلت واحد بس محكتش تفاصيل حاجة.
وأكمل: وبعد كده نزلت من البيت وكمان أنا مكنتش عارف انا رايح فين وروحت علي المكان اللي ركنت فيه التوكتوك واخدته وركنته في شارع جانبي في شبرا وروحت علي مكان في شبرا الخيمة في حته اسمها عزبة أبو السعود وفضلت قاعد في الشارع، وفي نفس اليوم روحت قعدت في جامع في شارع بعد القسم بشويه وطول الوقت صورة الراجل لم الطلقة جات في دماغه مش راضية تروح من مخي وفضلت قاعد في المسجد لحد بالليل وبعد ما خرجت من المسجد بقيت عمال ألف في الشوارع ومش عارف اروح فين ولا اعمل ايه لحد يوم الاتنين اللي فات كنت في المؤسسة واقف مش عارف اروح فين وكنت بدأت افكر اني أسلم نفسي لإني كنت سمعت ان أهلي مقبوض عليهم.
واختتم: وفجأة لقيت الحكومة عاملينلي كمين في منطقة المؤسسة وقبضوا عليا وحكيتلهم اللي حصل وحكيتلهم انا ركنت التوك توك فين وقلتلهم كمان على مكان التوك توك الأولاني اللي كنت واخده وخدوني علي قسم إمبابة ولاقيتهم هناك قابضين على حسام أخويا.
