وليد الحلفاوي: طول الوقت بانتقد أعمالي.. ومحمد فراج الأنسب لتقديم مسلسل كتالوج وإحنا محظوظين بجيله
تحدث المخرج وليد الحلفاوي، عن انتقاده لـ أعماله الفنية، بجانب الحديث عن أجدد أعماله الدرامية مسلسل كتالوج، وسبب اختياره للفنان محمد فراج لتقديم بطولته.
وقال في تصريحات إذاعية: أنا بنتقد أعمالي طول الوقت، حتى لو العمل من 6 سنين، وبييجي عليا وقت في المونتاج بقول كفاية ده لازم يقف علشان الشغل يطلع، وأنا الحمد لله ربنا كرمني في أعمال كتير الناس حبتها ولكني مبحبش أشوفها لأني مبشوفهاش كمشاهد وبنتقد نفسي.
وعن سبب اختيار الفنان محمد فراج لتقديم بطولة مسلسل كتالوج، علق وليد الحلفاوي: الشخصية كان فيها كم من التوتر وفراج يعرف يعمل الحتة دي كويس أوي من غير ما التوتر يكون مزعج للمشاهد، إحنا محظوظين بجيل محمد فراج وتايسون.
وواصل: كان في ناس كتير أوي في كواليس مسلسل كتالوج كانوا بيعيطوا، وتفاجـت أننا بعد تصوير مشهد بعد وفاة الأم العمال كانوا في حالة صمت ومحدش كان عايز يتكلم.
وليد الحلفاوي: السوشيال ميديا لعبة
كما تحدث المخرج وليد الحلفاوي، عن علاقته بمواقع التواصل الاجتماعي، قائلًا: علاقتي بالسوشيال ميديا مش قوية، بحاول أتعلم حاجات فيها ولكني بنسى، بس واضح أنها حاجة بتزداد أهمية في الحياة والواحد لازم يركز فيها، ولكن أنا لغاية دلوقتي شايفها لعبة ومبصدقش لما ناس يتخانقوا مع بعض ويعملوا إلغاء متابعة، يا جماعة أنتوا بتتخانقوا في لعبة، طب اتخانقوا بجد، أنا فاهم وجهة نظرهم وبيعملوا كده ليه ولكني مش قادر أشوفها غير لعبة.
